ပျားကြီး၊ ဇန်နဝါရီ ၁၅ ရက်၊ မြင်းခြံ
မန္တလေးတိုင်း၊ မြင်းခြံမြို့နယ်က ပျူစောထီးခေါင်းဆောင် သီတာယုမွန်ရဲ့ အမျိုးသားဖြစ်တဲ့ စိန်လွင်ကို မူးယစ်ဆေးဝါးတွေနဲ့အတူ ဖမ်းဆီးရမိခဲ့တယ်လို့ ဒေသခံ တော်လှန်ရေးတပ်ဖွဲ့ဝင်တွေက ပြောပါတယ်။
မြင်းခြံ – ညောင်ဦး ကားလမ်းပေါ်က တမိုက်သာကျေးရွာအနီးမှာ မနေ့ ဇန်နဝါရီလ ၁၅ ရက် မနက်ပိုင်းက စီးနင်းလာတဲ့ မော်တော်ယာဥ်နဲ့အတူ ဖမ်းဆီးရမိခဲ့တာဖြစ်ပါတယ်။
“ကျွန်တော်တို့ ဖမ်းမိထားတယ်ဆိုတာ မသိသေးလို့ မြို့ပေါ်မှာတော့ သီတာယုမွန်က ကား ၃ စီးနဲ့ လင်ပျောက်ရှာနေတယ်။ အခု ကျွန်တော်တို့ ထုတ်ပြန်လိုက်မှ သိသွားလို့ ပေါက်ကွဲပြီး မြို့ထဲပတ်ဆဲနေတယ်လို့ မြို့ခံတွေက ပြောတယ်။ စိန်လွင်ဆီမှာ WY တွေပါတယ်” လို့ မြင်းခြံခရိုင် အမှတ် ၃ တပ်ရင်းက တပ်ဖွဲ့ဝင်တစ်ဦးက ပြောပါတယ်။
ဖမ်းဆီးရမိထားတဲ့ စိန်လွင်ဟာ စစ်ကောင်စီရဲ့ ပျူစောထီး ဒုတိယခေါင်းဆောင်အဖြစ် အသိအမှတ်ပြုခံထားရသူဖြစ်ပြီး ဖမ်းဆီးရမိချိန်မှာ WY မူးယစ်ဆေးဝါးတွေ၊ ငွေကြေးအချို့နဲ့ ပျူစောထီး(ပြည်သူ့စစ်)သက်သေခံကဒ်ပြားပါ ရှိခဲ့ပြီး လက်နက်ခဲယမ်း တစုံတရာပါဝင်လာမှုတော့မရှိဘူးလို့ တော်လှန်ရေးတပ်ဖွဲ့ဝင်တွေက ဆိုပါတယ်။
သီတာယုမွန်ဟာ စစ်ကောင်စီရဲ့ အာဏာသိမ်းယူချိန်ကစပြီး မြင်းခြံမြို့ပေါ်မှာ ဆန္ဒပြသူတွေကို ဖမ်းဆီးတာ၊ ပျူစောထီးအဖွဲ့ ဖွဲ့စည်းပြီး မြို့နယ်ထဲက ကျေးရွာတွေ မီးရှို့တာ၊ ဒေသခံတွေကို ဖမ်းဆီးသတ်ဖြတ်တာနဲ့ ခြိမ်းခြောက်ငွေညှစ်တာတွေကို ဆက်တိုက်လုပ်ဆောင်ခဲ့တာဖြစ်တယ်လို့ မြို့ခံတွေက ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
