ယာရူစိင်း၊ ဇန်နဝါရီ ၁၉ ရက်၊ ကျေးသီး
ရှမ်းတောင် ကျေးသီးမြို့ရှိ မိုင်းကောင်ဂိတ်မှာ ဖြတ်သန်းသွားလာတဲ့ တွဲကားတွေကို ရှမ်းပြည်တပ်မတော်- SSPP/SSA က တစ်နှစ်စာအတွက် အခွန် သိန်းဆယ်ချီ ကောက်ခံနေပြီး ဖြတ်သမျှ ဂိတ်တွေမှာလည်း သောင်းဂဏန်း ထပ်မံ ကောက်ခံနေကြောင်း ဒေသခံတွေရဲ့ ပြောပြချက်အရ သိရပါတယ်။
တွဲကားတစ်စီးကို ၁ နှစ်စာအတွက် ၁၀ သိန်းထက်မနည်း ပေးဆောင်နေရပြီး အိမ်စီးကား တစ်စီးကိုတော့ ၂ သောင်းအထက် ပေးဆောင်ရတယ်လို့ သိရပါတယ်။
ကားသမားတွေအနေနဲ့ အခွန်ဆောင်ဖို့အတွက် SSPP ရဲ့ ဌာနချုပ်ဖြစ်တဲ့ ဝမ်ဟိုင်းမှာ သွားရောက် ပေးဆောင်ရတယ်လို့ မြေပြင်အခြေအနေသိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“မိုင်းကောင်ဂိတ်က ကျေးသီးမြို့တောင်ပိုင်း ၈ မိုင်အကွာလောက်မှာဘဲ ရှိတာ။ အခွန်က ကားသေး ကားကြီး ကုန်ကား အကုန်ပါဘဲ ဆောင်ရတာ။ အခွန်ဆောင်ဖို့ရန်အတွက် သူတို့တပ် ဌာနချုပ်ဖြစ်တဲ့ ဝမ်ဟိုင်းမှာ သွားပြီး ဆောင်ရတာပေါ့။ သူတို့ သတ်မှတ်ထားတဲ့ အခွန်ကြေးအတိုင်းဘဲ ပေးဆောင်ရတာပါ။ ဂိတ်ကြေးတော့ မဟုတ်ဘူး တစ်နှစ်စာ အခွန်ပေါ့နော်။ အခွန်စာရွက်စာတမ်းတွေ စစ်တယ်။ မဆောင်ရသေးဘူးဆို ဆောင်ခိုင်းတာပေါ့။ ဒါက ရှမ်းဂိတ်က စစ်တာပါ ဗမာဂိတ်တွေက မစစ်ဘူး”
အခွန်ဆောင်တဲ့ စာရွက်စာတမ်း ရှိထားပေမဲ့ SSPP ဂိတ် ၃ ဂိတ်ကို ဖြတ်သန်းရာမှာ ဂိတ်ကြေး ၅ ထောင်ကနေ ၁ သောင်းခွဲအထိ ထပ်ပေးရတယ်လို့လည်း ၎င်းက ဆက်ပြောပါတယ်။
နောက်ထပ် သတင်းအရင်းအမြစ် အမျိုးသားတစ်ဦးက “၂၀၂၅ ခုနှစ်အတွက် ၁ နှစ်စာအခွန်ကို အတင်းဆောင်ခိုင်းတယ်လို့ ကျနော်လည်း ကြားရတယ်။ နှစ်တိုင်းတော့ အခွန်ဆောင်ရပါတယ်။ နှစ်ဟောင်းကုန်လို့ နှစ်သစ်အတွက် အခွန်ဆောင်ခိုင်းတာလည်း ဖြစ်နိုင်တယ်။ အများဆုံးအခွန်ဆောင်ရတာတော့ တွဲကားပေါ့။ ကားသေးတွေကျ ဘယ်လောက် ပေးဆောင်ရလဲဆိုတာတော့ ကျနော်လည်း မသိပါဘူး။ သူတို့ သတ်မှတ်ထားတဲ့ အခွန်ဆိုတာ ရှိပါသေးတယ်။ တွဲကားဆိုဘယ်လောက် အဓိက ကားအမျိုးအစားနဲ့ ဆိုင်တာပေါ့” လို့ ပြောပါတယ်။
ရှမ်းတောင် ကျေးသီးကနေ ရှမ်းမြောက် မိုင်းရယ်မြို့ဘက်သွားဖို့ ကောင်းလန်းရွာတံတား မရောက်ခင်မှာ စစ်တပ်ရဲ့ ဂိတ် ၂ ဂိတ် ရှိထားပြီး စစ်ဆေးမှု တင်းကြပ်တဲ့အပြင် ငွေပေးရင်တော့ ဖြတ်သန်းခွင့် ပြုပြီးတော့ တချို့ရက်မှာ ဂိတ် ပိတ်တတ်တယ်လို့လည်း ဒေသခံတွေရဲ့ ပြောပြချက်အရ သိရပါတယ်။
