အလင်း၊ ဇန်နဝါရီလ ၁၂ ရက်၊ ဖလမ်း
ချင်းပြည်နယ်မြောက်ပိုင်း၊ ဖလမ်းမြို့နယ်၊ သီးဘွာလ်ကျေးရွာက တိုက်နယ်ဆေးရုံဟာ လေကြောင်းဗုံးကြဲခံရပြီး ဆေးရုံအပါအဝင် ဝန်ထမ်းအိမ်ယာ (၆) လုံးထက်မနည်း ပျက်စီးသွားတယ်လို့ ဒေသခံတစ်ဦးက ရွှေဖီမြေသို့ ပြောပါတယ်။
ဖလမ်းမြို့နယ် ဖလမ်း-ရိဒ်ခေါဒါရ် လမ်းပေါ်မှာရှိတဲ့ သီးဘွာလ် တိုက်နယ်ဆေးရုံကို စစ်ကောင်စီက မနေ့ ဇန်နဝါရီ ၁၁ ရက် ည ၉ နာရီ ၂၂ မိနစ်ခန့်မှာ ဂျက်ဖိုက်တာတစ်စီးနဲ့ လေကြောင်း ဗုံးကြဲတိုက်ခိုက်သွားတာဖြစ်ပါတယ်။
“ဆေးရုံကို ဗုံးကြဲတာပါ။ ဆေးရုံ၊ ဝန်ထမ်းအိပ်ရာ အကုန်လုံး ပျက်စီးသွားပါတယ်။ လူထိခိုက်မှုတော့ မရှိဘူး။” လို့ ဖလမ်းမြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
ဆေးရုံဟာ လည်ပတ်တာမရှိဘဲ ပိတ်ထားတာ ကြာပြီဖြစ်တာကြောင့် မနေ့ညက လေကြောင်း ဗုံးကြဲတိုက်ခိုက်မှုမှာ လူထိခိုက်မှု မရှိဘူးပဲ ဆေးရုံ၊ ဝန်ထမ်းအိပ်ရာတွေ ပျက်စီးသွားတယ်လို့ သိရပါတယ်။
“လူထိခိုက်မှု မရှိဘူး။ နိုင်ငံရေးမကောင်းကတည်းက ဆေးရုံက ပိတ်ထားတာကြောင့် ဆေးရုံမှာ လူလည်းမရှိတော့သလို လူနာတွေလည်း မရှိတော့ ထိခိုက်မှုမရှိဘူး။” လို့ ဖလမ်းမြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
သီးဘွာလ် တိုက်နယ်ဆေး ဗုံးကြဲပြီးနောက် Sim Dihai ရွာနဲ့ Tibual ကိုလည်း စစ်ကောင်စီက လေကြောင်း ဗုံးကြဲ တိုက်ခိုက်သွားတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
