ယာရူစိင်၊ ဇန်နဝါရီ ၈ ရက်၊ ဂန့်ဂေါ
မကွေးတိုင်း ဂန့်ဂေါမြို့နယ်က ဘုန်းကြီးကျောင်းတစ်ကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် သံဃာတော် ၂ ပါး ထိမှန်ဒဏ်ရာရရှိခဲ့တယ်လို့ ဒီဖြစ်စဉ်ကို သိရှိထားတဲ့ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဇန်နဝါရီ ၇ ရက် ညနေ ၆ နာရီခွဲဝန်းကျင်မှာ ဂန့်ဂေါမြို့နယ် မြင်းဇာကျေးရွာ ဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံး ၂ လုံး ကြဲချတိုက်ခိုက်ခဲ့တာ ဖြစ်ပါတယ်။
“ဘုန်းကြီး ၁ ပါးနဲ့ ကိုရင်လေး ၁ ပါး ဒဏ်ရာရတာပါ။ ဒဏ်ရာက မစိုးရိမ်ရဘူးလို့ သိထားပါတယ်။ နေ့စဉ်နေ့တိုင်း ဗုံးကြဲနေတော့ သေဆုံးမှုတွေလည်း နေ့ရက်ဆက် ရှိနေတာပါ” လို့ အဆိုပါ အမျိုးသားက ပြောပါတယ်။
စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် မြင်းဇာရွာရဲ့ ဘုန်းကြီးကျောင်းဆောင်တချို့ မီးလောင်ပျက်စီးခဲ့တယ်လို့ အထက်ပါ အမျိုးသားက ဆက်ပြောပါတယ်။
ဒါ့အပြင် မနေ့ ဇန်နဝါရီ ၇ ရက်မှာပဲ မကွေးတိုင်း ထီးလင်းမြို့ အနောက်ဘက်ခြမ်းရှိ စစ်ရှောင်တွေ နေထိုင်တဲ့ ကျေးရွာတွေကို စစ်ကောင်စီတပ်က Y12 နဲ့ ဗုံးအလုံးရေ ၁၀၀ ကျော် ကြဲချတိုက်ခိုက်ခဲ့လို့ ဒေသခံ ၁ ဦး သေဆုံးပြီး အနီးရှိ ကျေးရွာ ၇ က ဒေသခံတွေ ထွက်ပြေးတိမ်းရှောင်နေရပါတယ်။
စစ်ကောင်စီတပ်ဟာ မကွေးတိုင်းထဲက မြို့နယ်တွေအပါအဝင် စစ်ကိုင်းတိုင်းထဲက တော်လှန်ရေးတပ်တွေ ထိန်းချုပ်ထားတဲ့ နေရာတွေကိုလည်း လေကြောင်းအပါအဝင် စစ်ကြောင်းထိုးတာတွေ ထိုးစစ်ဆင် တိုက်ခိုက်တာတွေ ပြုလုပ်ခဲ့တာကြောင့် အရပ်သားထိခိုက်သေဆုံးမှုတွေလည်း နေ့စဉ်နေ့တိုင်း ရှိနေပါတယ်။
လေကြောင်းတိုက်ခိုက်မှုတွေထဲမှာ စစ်ကိုင်းတိုင်းက အများဆုံး တိုက်ခိုက်ခံရပြီး မကွေးတိုင်းက ဒုတိယအများဆုံး ဖြစ်ကြောင်း မြန်မာ့စစ်ဘက်ရေးရာနဲ့ လုံခြုံရေးဆိုင်ရာလေ့လာရေးအဖွဲ့ MDSI ရဲ့ ပြီးခဲ့တဲ့ ဇန်နဝါရီ ၅ ရက် ထုတ်ပြန်ချက်အတွင်း ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
