မိုင်းရူပ၊ ဇန်နဝါရီ ၈ ရက်၊ မောက်မယ်
စစ်ကောင်စီတပ်နဲ့ ၎င်းရဲ့ လက်အောက်ခံ ပအိုဝ်းပြည်သူ့စစ် PNO/PNA တပ်တွေရဲ့ ထိုးစစ်ကြောင့် ရှမ်းတောင် မောက်မယ်မြို့နယ်ထဲမှာ ပအိုဝ်းအမျိုးသား လွတ်မြောက်ရေးတပ်မတော် PNLA နဲ့ တိုက်ပွဲဖြစ်ပွားနေတယ်လို့ PNLA က ပြောပါတယ်။
ဒီဇန်နဝါရီလ အစပိုင်းကစပြီး PNLA ထိန်းချုပ်ထားတဲ့ မောက်မယ်မြို့နယ် ဟိုနမ့်နဲ့ ကဒူကြီးဒေသတွေမှာ တိုက်ပွဲဖြစ်ပွားနေတာဖြစ်ပြီး ဒီနေ့ ဇန်နဝါရီ ၈ ရက်အထိလည်း တိုက်ပွဲတွေ ဆက်ဖြစ်နေတယ်လို့ ဆိုပါတယ်။
“ကျနော်တို့က တောထဲမှာပဲ နေပါတယ်။ ကျနော်တို့ နေတဲ့ တောတောင်တွေထဲအထိ ထိုးစစ်မလုပ်ဘူးဆိုရင် တိုက်ပွဲဖြစ်စရာအကြောင်း မရှိပါဘူး။ တိုက်ပွဲကတော့ ဒီနေ့အထိ ဖြစ်နေပါတယ်” လို့ PNLA ရဲ့ ပြောရေးဆိုခွင့်ရှိသူ ကိုခွန်ရိန်းယံက ရွှေဖီမြေကို ပြောပါတယ်။
တိုက်ပွဲအတွင်း စစ်ကောင်စီတပ်နဲ့ PNO ရဲ့ လူသားဒိုင်းအဖြစ် အသုံးပြုခံရတဲ့ အရပ်သား ၂ ဦးကို PNLA ဘက်က ကယ်ထုတ်နိုင်ခဲ့တယ်လို့ ခွန်ရိန်းယံက ဆက်ပြောပြပါတယ်။
ဒါ့အပြင် တိုက်ပွဲအတွင်း စစ်ကောင်စီနဲ့ PNO ဘက်က ၂၀ ကျော် သေဆုံးကြောင်း PNLA က ထုတ်ပြန်ထားပြီး ရွှေဖီမြေကတော့ သီးခြားအတည်ပြုနိုင်တာ မရှိသေးပါဘူး။
ပြီးခဲ့တဲ့ ၂၀၂၄ ခုနှစ် နှစ်ဆန်းပိုင်းကတည်းက ရှမ်းတောင် ဟိုပုံးမြို့နယ်ထဲမှာ စစ်ကောင်စီတပ်နဲ့ PNLA တပ်တွေအကြား တိုက်ပွဲစတင်ဖြစ်ပွားခဲ့ပြီး PNLA က ရှမ်းတောင် ဆီဆိုင်မြို့ကို ထိန်းချုပ်နိုင်ခဲ့ပေမယ့် ၂၀၂၄ ခုနှစ် ဧပြီလထဲမှာ စစ်ကောင်စီလက်အောက် ပြန်ရောက်သွားပါတယ်။
PNLA ထဲမှာ စစ်ကောင်စီကို တိုက်ခိုက်မယ့်အဖွဲ့နဲ့ တနိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူစာချုပ် NCA လမ်းကြောင်းအတိုင်း ဆက်သွားမယ်ဆိုတဲ့ ဗိုလ်မှူးကြီး ခွန်ဥက္ကာ ဦးဆောင်တဲ့အဖွဲ့ ဆိုပြီး နှစ်ဖွဲ့ကွဲနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
