မာည်းရူပ၊ ကျံရ်ဇံန်နႎရီ ဆငည်း 7
ကဲပြိူဝ်ႈပျေဲႈဒေဲႈဖါ်ႈ အရာပ် (1) အ်ုန်အီမိုႈဒီပ်ုန်ထိင်ခြဲအူန်း တံပ်ကိုးကာင်း MNDAA ကဲနီန်ပဲန် အိူင် 4အိူင်ကာည်း ကီုင်းဒါင်းအူလှေ ဆဲႈဒါႇဒီန် MNDAA ကဲ ပ္လိူရ်ႈလေႈ ခည်ကျံရ်ဇံန်နႎရီ ဆငည်း 6ဒိူန်ဒါႈ ကဲဟည်ဘယ်ဒေပြိူဝ်ႈဒေဲႈ ဇီုင်းကာန်ဒါင်းအူလှေယာ့်အောႏ။
ကဇေန်နီး ခေဲင်အရာပ်ကိုးကာင်းကဲ အာဝ်မိူဝ်ႈယာ့် တံပ်ကညာအာဏာဆီုက်ဇေဝ်ကဲ ဘည်ဟည်ႎီရ်ဘယ်ကဲတ ထိင်ခြဲ အရာပ်ကိုးကာင်းကာည်း ကီုင်းမိုင်းကိုး ကီုင်းတေင်နီ ကပီုန်ဆျှံမ်ကဒါႇပိူည်ကာည်း ဒီခေဲင်ကီုင်းအေဲမ်ကိုက်မာ် ကဲဟည်ဘယ်ဒေထိင်ခြဲအူန်းယာ့်အောႏ။
ကဝ်အီဂေါည်ကဒံတ်တောပ် MNDAA ကဲနီန်အူအီး က္လာင်းဒါႈ ကဲပ္လအူန်းဖါ်ႈ ကီုင်းလောက်ကည်နီန်ပဲန် ကီုင်းဒါင်း အရာပ် (1) ဆဲႈဒါႇဒီန် ကဲနံင်အူဘြောင်ဟာဝ်း တောပ်အိူင်အေဲမ်ကိုက်၊ တေင်နီ၊ မိုင်းကိုးကာည်း အိူင်လောက်ကည်အောႏ။
ဆဲႈဒါႇဒီန် MNDAA ကဲက္လာင်းဒါႈ ကဲပ္လအူန်း ဆန်ုမ် 2024 ကျံရ်ဇံန်နႎရီ ဆငည်း 5နီန်မိုႈ ဆငည်းထွံတ်ဆငည်းမျြံတ် မိုႈဆငည်းဘိူန်းကဲတဆီမ်းႎီရ် အရာပ်ကိုးကာင်းနီန် ပါ်အရာပ်အောာႏ။
ဂေါႇဘည်ဒီန် စီပဲန်ကာ်မ်မတီ လံပ်ဘြောင်ချှာင်ကဲ ပ္လိူရ်ႈလေႈ ဘည်ပ္လကဲတ ကျံရ်ဇံန်နႎရီ ဆငည်း 5နီန် မိုႈ “ဆငည်းလံပ်ႎီရ်ပျိူဝ်ႇယိူဝ်ႇ” ကဲအောႏ။
ဘံန်ဟောည်ႇကိုင်းဖါ်ႈလာ်ဒါလာက်နာက် တီုက်ႎှီုန်း ဘြည် 14ဆန်ုမ်နီန် ကဲဒါႈ ကဲဟည်ဘိူန်းဒေ တိူဝ်ႈႎီရ် အရာပ်ကိုးကာင်း အ်ုန်အီမိုႈ အရာပ်ကဲ အခည်းနီန်အောႏ။
ဇိုချီုင် လံပ်တီုက်နာန်း 1027နီန် MNDAA ကဲ ဟည်ဘယ်ဖါ်ႈ ထိင်ခြဲအူန်း လာဆေဝ်၊ လောက်ကည်၊ ကုင်စါန်း၊ ကူန်လိုင်၊ ချှီန်းဆျှိုည်ဟော်၊ မိုင်းကိုး၊ တာမိုးညဲ၊ စူကုက် (ပါင်ဆာင်း) ကဲနီန် ဆဲႈဒါႇဒီန် လံပ်ဘြောင်ချှာင်ကဲမာ် ဂီုည်ကပါ်ႇကပံန်အူန်း ခေဲင်အရာပ်ကဲဒီန်အောႏ။
ဆာ်မိုႈကီုင်းလာဆေဝ် အ်ုန်အီမိုႈဒီပ်ုန်ထိင်ခြဲအူန်းကဲဒီန် ဂေါႇပ်ုန်လီပ်ကမိုန်ခယ် ကဲဟည်ဘ်ုပ်အာပ်ႎီရ်ဘိုး ကီုင်းလာဆေဝ်နီန် တတံပ်ကညာအာဏာဆီုက်ဇေဝ်ကဲ ဇူႈပွံတ်ဆန်ုမ် 2025 ကျံရ်ဇံန်နႎရီဒိူန် ခနားတံပ်ကိုးကာင်းကာည်း တံပ်ကညာအာဏာဆီုက်ဇေဝ်ကဲ ဟည်ဇံင်းဒါ့်ဖါ်ႈ လံပ်ကတီုက်ကပဴင်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
