မိုင်းရူပ၊ ဇန်နဝါရီ ၁၈ ရက်၊ မိုးကုတ်
တအာင်းတပ်မတော်- PSLF/TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့မှာ သေနတ်နဲ့ ခြိမ်းခြောက်ပြီး ဓားပြတိုက်မှု ထပ်မံ ဖြစ်ပွားခဲ့တယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဇန်နဝါရီ ၁၄ ရက် နေ့လယ် ၁ နာရီ ၁၅ မိနစ်မှာ မိုးကုတ်မြို့အနောက်ပိုင်း ညောင်ပင်ကြီးရပ်ကွက်ရှိ နေအိမ်တစ်ခုမှာ ပစ္စတိုသေနတ် ကိုင်ထားတဲ့ အသက် ၃၀ အရွယ် အမျိုးသားတစ်ဦးက ဓားပြ ဝင်တိုက်ရာ ငွေ ၇၄၈ သိန်းနဲ့ သိန်း ၅၀ ဝန်းကျင်တန်ဖိုးရှိ နားကပ်တစ်ရံ စုစုပေါင်း တန်ဖိုး သိန်း ၈၀၀ နီးပါး ပါသွားခဲ့ပါတယ်။
“ဓားပြ လာတိုက်တဲ့သူက အသက် ၃၀ ဝန်းကျင် ရှိမယ်။ Mask တပ်ပြီး သေနတ်နဲ့ ခြိမ်းခြောက်သွားတာ။ သိန်း ၈၀၀ နီးပါး ပါသွားတယ်” လို့ ဖြစ်စဥ်ကိုသိရှိတဲ့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
လက်ရှိအချိန်ထိ ဓားပြတိုက်တဲ့ အဲဒီအမျိုးသားကို PSLF/TNLA ဘက်က ဖမ်းဆီးရမိတာ မရှိသေးဘူးလို့ သိရပါတယ်။
မိုးကုတ်မှာ ဓားပြတိုက်မှု မကြာခဏဖြစ်ပွားနေတာကြောင့် လုံခြုံရေးအတွက် လူထုတွေကြား စိုးရိမ်မှု ရှိနေပါတယ်။
ပြီးခဲ့တဲ့ ဇန်နဝါရီ ၁၀ ရက်ကလည်း မိုးကုတ်မြို့အနောက်ပိုင်း ရေဦးကြီးရပ်ကွက်ရှိ နေအိမ်တစ်ခုမှာ ဓားပြတိုက်မှု ဖြစ်ပွားခဲ့ရာ အမျိုးသားတစ်ဦး ပစ်ခတ်ခံရပြီး သေဆုံးသွားပါတယ်။
ပြီးခဲ့တဲ့ ၂၀၂၄ ဒီဇင်ဘာ ၁၉ ရက်ကလည်း TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့နယ် ၇ မိုင်ရွာက နေအိမ်တစ်ခုမှာ ဓားပြတိုက်မှု ဖြစ်ပွားခဲ့ပြီး လက်ဝတ်ရတနာတချို့ ပါသွားခဲ့ပါတယ်။
မိုးကုတ်မှာ ဓားပြတိုက်မှု မကြာခဏဖြစ်ပွားနေတာနဲ့ ပတ်သက်ပြီး အသေးစိတ်သိရဖို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးကို စာပို့ဆက်သွယ်ခဲ့ပေမဲ့ လက်ခံဖြေကြားတာတော့ မရှိသေးပါဘူး။
လက်ရှိ မိုးကုတ်မှာ TNLA တပ်ဖွဲ့အပြင် တခြားတော်လှန်ရေးတပ်ဖွဲ့ ၄ ဖွဲ့ထက်မနည်းလည်း သွားလာလှုပ်ရှားနေတယ်လို့ ရွှေဖီမြေက စုံစမ်းသိရှိရပါတယ်။
