ရဲမာန်၊ ဇန်နဝါရီ ၂ ရက်၊ အင်းတော်
စစ်ကိုင်းတိုင်း အင်းတော်မြို့နယ် မော်လူးဒေသက အမျိုးသားညီညွတ်ရေးအစိုးရ NUG က ဖွင့်လှစ်ထားတဲ့ စာသင်ကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ကျောင်းသူ ၁ ဦး သေဆုံးပြီး ၂ ဦး ဒဏ်ရာရရှိခဲ့တယ်လို့ သိရပါတယ်။
ဒီနေ့ ဇန်နဝါရီလ ၂ ရက် မနက် ၁ နာရီခွဲဝန်းကျင်မှာ အင်းတော်မြို့နယ် ပဲခူးရွာက စာသင်ကျောင်းကို စစ်ကောင်စီတပ်က ဂျက်ဖိုက်တာနဲ့ ဗုံး ၂ လုံး ကြဲချတိုက်ခိုက်ခဲ့တယ်လို့ Indaw Revolution – IR က ထုတ်ပြန်လာတာ ဖြစ်ပါတယ်။
“ဗုံး ၂ လုံးကြဲချသွားတာ။ ပေါင်က ဘယ်လောက်လဲဆိုတာတော့ မသိဘူး။ စာသင်ကျောင်း ဘေးနားလေးတွေ ကျတာ။ ကျောင်းဆောင်နဲ့ ရွာထဲက အိမ်တွေ ပျက်စီးသွားတယ်။ သေဆုံးသွားတဲ့ ကျောင်းသူက Grade-12 သူပါ။ ပဲခူးရွာမှာ အထက်တန်းရှိတော့ တခြားရွာကနေ ကျောင်းအိပ်ကျောင်းစား အဆောင်သဘော လာတက်တဲ့ ကလေးတွေပါ။ Grade -12 ကျောင်းသူ ၂ ဦးလည်း ထိခိုက်ဒဏ်ရာရရှိခဲ့တယ်” Indaw Revolution – IR မှ တာဝန်ရှိသူတစ်ဦးက ရွှေဖီမြေကို ပြောပါတယ်။
မော်လူးဒေသကို ပြီးခဲ့တဲ့ ၂၀၂၅ မေလ ၁၂ ရက်တုန်းကလည်း စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ အရပ်သား ၂ ဦး သေဆုံးခဲ့တယ်လို့ ၎င်းက ဆက်ပြောပါတယ်။
“စစ်ကောင်စီဘက်နေနေ NUG ဘက်နေနေ ကလေးတွေမှာ ပညာသင်ကြားခွင့်ရှိတယ်။ ကျနော်တို့ဘက်မှာလည်း စစ်ကောင်စီတပ်ဘက်ကို ကျောင်းသွားတဲ့ ကလေးတွေ ရှိတယ်။ သူတို့ရွေးချယ်မှုနဲ့ သူတို့ဆိုပြီး ကျနော်တို့ဘက်က ဘာမှလုပ်တာမရှိဘူး။ အခုလို စစ်ကောင်စီတပ်ဘက်က NUG ကျောင်းကို ရည်ရွယ်ချက်ရှိရှိ ဗုံးကြဲတိုက်ခိုက်တာဟာ လူမဆန်တဲ့လုပ်ရက်တခုလို့ မြင်တယ်” လို့ အထက်ပါ တာဝန်ရှိသူက ဆက်ပြောပါတယ်။
ဒါ့အပြင် ၂၀၂၅ ဧပြီလ ၁ ရက် နေ့လယ် ၁၂ နာရီခွဲလောက်မှာလည်း အင်းတော် မြို့မကျောင်းကို စစ်ကောင်စီတပ်က လေကြောင်းကနေ ဗုံးကြဲချခဲ့လို့ ဘုရားကုန်းမှာ ရှိနေတဲ့ အရပ်သား ၂ ဦး သေဆုံးပြီး ၈ ဦး ဒဏ်ရာရရှိခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
