အိုက်ပွီး၊ ဒီဇင်ဘာ ၂၉ ရက်
ချင်းပြည်နယ်၊ ဖလမ်းမြို့နယ်၊ သီးဖီရ်ရွာမှာ စစ်ကောင်စီတပ် လေကြောင်း ဗုံးကြဲ တိုက်ခိုက်လို့ ဘုရားကျောင်းအပါအဝင် နေအိမ် ၂၀ လုံးထက်မနည်း ထိခိုက်ပျက်စီးသွားတယ်လို့ ဒေသခံအမျိုးသားတဦးက ရွှေဖီမြေသို့ ပြောပါတယ်။
ရွေးကောက်ပွဲ ကျင်းပတဲ့ရက်ဖြစ်တဲ့ ဖလမ်းမြို့နယ်၊ သီးဖီရ်ရွာမှာ မနေ့ ဒီဇင်ဘာ ၂၈ ရက်နေ့၊ ညနေ ၅ နာရီဝန်းကျင်မှာ စစ်ကောင်စီက ဂျက်ဖိုက်တာတစ်စီးနဲ့ နှစ်ကြိမ်ခန့် လာရောက်ပြီး လေကြောင်း ဗုံးကြဲတိုက်ခိုက်ခဲ့တာဖြစ်ပါတယ်။
“ဗုံးက နှစ်ကြိမ် လာကြဲတယ်။ နေအိမ် သုံးလုံးပြာကျတယ်။ တစ်အိမ်က လုံးဝ ပျက်စီးသွားပြီး နောက်ထပ် (၁၆) လုံးလည်း ထိခိုက်ပျက်စီးသွားပါတယ်။ ဘုရားကျောင်းလည်း အတော်ပျက်စီးသွားတယ်။”လို့ ဒေသခံတစ်ဦးက ရွှေဖီမြေသို့ ပြောပါတယ်။
သီးဖီရ်ကျေးရွာအနီးမှာ ပြီးခဲ့တဲ့အပတ်ကတည်းက တိုက်ပွဲဖြစ်တာကြောင့် ရွာသားတွေဟာ ထွက်ပြေးတိမ်းရှောင်နေကြတဲ့အတွက် လူထိခိုက်မှုမရှိဘူးလို့ သိရပါတယ်။
“ရွာသားတွေက ရွာအနီးအနားမှာ တိုက်ပွဲဖြစ်လို့ အကုန်စစ်ဘေးရှောင်ကြလို့ မနေ့က ဗုံးကြဲတဲ့ချိန် ထိခိုက်မှုမရှိပါဘူး။ အိမ်တွေလောက်ပဲ ထိခိုက်မှုရှိတယ်။ စစ်ကောင်စီက သူတို့စစ်ကြောင်းအတွက် လေကြောင်းကနေ ရှင်းပေးတာဖြစ်မယ်။”လို့ အထက်ပါ ဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ ဒီဇင်ဘာလ ၇ ရက်နေ့ကလည်း သီးဖီရ်ကျေးရွာကို စစ်ကောင်စီက လေကြောင်း ဗုံးကြဲတိုက်ခိုက်လို့ လူနေအိမ်တချို့ ထိခိုက်ပျက်စီးသွားတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
