ဂေါႇမိုႈကဲဘိအူန်း ကပုဆဘော စီပဲန်ဘ်ုပ်ဒဲႈပွံတ်ရိူန်း ငေါႈခ္လေါႈပ္လေါင် ကားအူကြောင်နီန် ပေန်ဆဲန်ဘျာ ပကီုင်းပြီမ်ဆ‌ဘော၊ ဘည်ဘိကဲတကပုနီန် နှေရ်ပွံတ်မိုႈ ကနာည်နံင်မှာန်းရိူန်း

ယာရူစိင်၊ ကျံရ်ဒီဆဲမ်ဘာ ဆငည်း 26၊ ဆဘော

ကညာကားအူအီး က္လာင်းတဆျှိုည်ဖီမျေဒါႈ ဂေါႇမိုႈကပုပ်ုန်လည်ဘိအူန်း တံပ်ကညာအာဏာဆီုက်ဇေဝ်ကဲကာည်း တံပ်ကိုးကာင်းကဲ ပကီုင်းဆဘော အ်ုန်အီမိုႈဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် ညှံမ်ႎီရ်ႎိူဝ်ႈ စီပဲန်တိုအီးခေဲင်အရာပ်ကဲ ဘ်ုပ်ဒဲႈပွံတ် ငေါႈခ္လေါႈပ္လေါင်ဒီန် ပေန်ဆဲန်အောႏ။

ဂေါႇမိုႈကဲဆီုင်ဂီုည်ဘိအူန်း ကပုဆဘော စီပဲန်တံပ်ကညာအာဏာဆီုက်ဇေဝ်ကဲ တိူရ်ႈပွံတ်လာ်ဒါ တဇားကား စီကဲပ်ဟာဝ်းလာ်ရိူန်း ယိူဝ်ႇ 2ဆဲန် ရောတ်ဘံင် 5နီန် ပကီုင်းပြီမ်ဆဘောအောႏ။

“ဆာ်မိုႈကဒါႇ တိမ်တောင် အ်ုန်မိုႈကိုးကာင်းကဲဒီးကော်။ ယဲဟိုက်ဒေဲႈ ပဆဘောနီန် ယိူဝ်ႇကဒါႇမာဝ်းႎံင်း။ ဆာ်အယ်ဆိင်ဟာဝ်းကဒါႇလာဆေဝ် ဘ်ုပ်ခ္လေါႈအိုမ်ပ္လေါင်ဒီန်ယာ့်။ အရာပ်ခေါပ်ပြာအိုမ်ဒီန်မိုႈ တံပ်ကညာအာဏာဆီုက်ဇေဝ်ကဲ အီရဲ့ဒေကဲပ်ရိူန်း။ ဆာ်မိုႈကဲအီကခါမ်ဒဲႈတအယ်ဒီန် ကဲဒါလိူည်ဂြူအယာတ်။ နံင်ဆမာမိုႈစံမ် ကောန်ဆီုက်ကဲ။ မံင်ခ္လမာ် မိူဝ်ႈအူန်းအီးဘ်ုပ်ဒဲႈ 5ဆဲန်”

ဇူႈပွံတ်ကျံရ်နိုႎဲမ်ဘာ ဆငည်း 14 ခိင်ညှာ 6နြီဒိူန် တံပ်ကဲအာရ်တံပ် လည်ဘိဖါ်ႈကပုဆဘောဒီန် မောကံပ်ရောတ် ဘံင်ကျံရ်ဒီဆဲမ်ဘာ ဆငည်း 25နီန်ယာ့်အောႏ။

ကောန်အီပ်ုန်ကဝ်အီဂေါည်ပဆဘောဒီန် အူအီး က္လာင်းဒါႈ “ဆာ်မိုႈယဲ ကနာည်နံင်ဟိုက်ဆိုရ်ဒါႇတွည်း ယဲဘ်ုပ်ကခါမ်ဒါစာက်ဒီးကော်။ ကဇေန်နီး တိုအီးလိူည် ကံပ်အာဝ်ဘိူန်းယာ့် ဟာဝ်းတေဲင်ကပုဒီန်။ ကဲအာဝ်ဒဲႈယာ့်အီးဟာဝ်းႎီရ် ဘာည်းခည်ဇူႈဘိကဲ တကပုဒိူန်။ မိုႈလိူည်တိုအီးပ်ုန်ဆိင်ဒဲႈကဲ ဘိူန်းဒေခ္လေါးဟာဝ်း ပကပုဒီန်”

တောပ်ဘည်မိုႈကား ဘည်ဘ်ုပ်ဒဲႈငေါႈခ္လေါႈဒီန်ပေန်ဆဲန် ဆဲင်ကယ် 1ကြောင်မာ် ဘ်ုပ်ဒဲႈပွံတ် 2မှီုန်အောႏ။

မိူဝ်ႈဘိုး ကောန်အီမာည်း ကဝ်အီဂေါည်ပကီုင်းဆဘောဒီန်အူအီး က္လာင်းဒါႈ “ပုင်စါမ်ကဲ ဘာည်းပွံတ်ကဲဘိ ကနာည်နံင်ဘိူန်းရိူန်းလှိူဝ်းယာ့်။ ဘိဖါ်ႈကပု စီဆူည်ႇအီး ကခါမ်ဒါအိုမ်ပ္လေါင်။ ခံင်မိုႈဘ်ုပ်ဒဲႈဘိုး ငေါႈကခါမ် ရိူန်းကဲဒီန် ဘာည်းလိူည်အ်ုန်မိုႈ ရိူန်းလှိူဝ်းအူလှေဒီး။ ဘည်ရေဲန်ကဲနီန် မိုႈပွံတ်ကဲပ်ုန်ကီန်း တိုအီးခေဲင်အရာပ်ကဲယာ့်”

ဆဲႈဒါႇဒီန် ဂေါႇမိုႈကဲဘိကပုဆဘော စီပဲန်တိုအီးခေဲင်အရာပ်ကဲ ဘ်ုပ်ဒါလိူည် အိုမ်ပ္လေါင်တာလိုင် တောပ်ဘိုးဘည်မိုႈကား ဆဲင်ကယ် SSPP ကဲ ဂီုည်ကဲပ်ဘိုးငေါႈ ကခါမ်ဒီန်အောႏ။

ဘံန်ဟောည်ႇဘိ တံပ်အာရ်တံပ်ကဲ တကပုဆဘောဒီန် လှေင်ဘြည် 5ဆငည်း ဒေင်ကဒါႇနော်င်ခေဝ်ကာည်း ကျောက်ဂူမာ် တံပ်ကညာအာဏာဆီုက်ဇေဝ်ကဲ ဘိအူန်းဘိုး ခည်ကျံရ်နိုႎဲမ်ဘာ ဆငည်း 18ဒိူန် မိုႈလိူည် ကျံရ်နိုႎဲမ်ဘာ ဆငည်း 23ဒိူန် ကဲစီႎီရ်ႎိူဝ်ႈဒဲႈဘိုးအောႏ။

ကဝ်အီကပ္လါႇဘေဲႇဆဒါင် – Lway N Tra

~ ~ ~

ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။