အိုက်ပွီး၊ ဇန်နဝါရီ ၁၇ ရက်၊ ခမ်းပတ်
စစ်ကိုင်းတိုင်း ခမ်းပတ်မြို့နဲ့ ကာနန်ရွာကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်လို့ ကလေးတစ်ဦးအပါအဝင် ၅ ဦး သေဆုံးပြီး ဘုန်းကြီးတစ်ပါးအပါအဝင် ၁၀ ဦးထက်မနည်း ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
တော်လှန်ရေးတပ်ဖွဲ့တွေက ၂ နှစ်နီးပါးကြာ ထိန်းချုပ်ထားတဲ့ ခမ်းပတ်မြို့နဲ့ ကာနန်ရွာကို မနေ့ ဇန်နဝါရီ ၁၆ ရက် ည ၈ နာရီခွဲမှာ လေကြောင်းကနေ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
“ဂျက်ဖိုက်တာတစ်စီးနဲ့ ခမ်းပတ်မြို့ထဲ နှစ်ကြိမ် ကာနန်ရွာမှာတစ်ကြိမ် ကြဲတာပါ။ တစ်ခါ ဗုံးကြဲရင် ၅ မိနစ်ခြားနဲ့ ဗုံးသီးအလုံးအရေ အများအပြားနဲ့ ကြဲသွားတာပါ။ ကလေးတစ်ယောက်နဲ့ အမျိုးသမီးတစ်ယောက်က ပွဲချင်းပြီး သေဆုံးသွားတယ်။ နောက်ထပ် ယောက်ျားလေး သုံးယောက်လည်း ဒဏ်ရာနဲ့ သေဆုံးသွားတယ်” လို့ ခမ်းပတ်မြို့ခံတစ်ဦးက ရွှေဖီမြေသို့ ပြောပါတယ်။
ဒါ့အပြင် ကာနန်ရွာက ကျောင်းထိုင်ဘုန်းကြီးတစ်ပါးအပါအဝင် ၁၀ ဦးထက်မနည်း ဒဏ်ရာ ရရှိပြီး အဲဒီထဲက ဘုန်းကြီးတစ်ပါးအပါအဝင် ၃ ဦးဟာ ပြင်းထန်ဒဏ်ရာ ရတဲ့အတွက် အသက်အန္တရာယ် စိုးရိမ်နေရသလို ဒဏ်ရာရသူအားလုံး ဆေးကုသမှု ခံယူနေရပါတယ်။
လေကြောင်းနဲ့ တိုက်ခိုက်တာကြောင့် ခမ်းပတ်မြို့ အမှတ်(၁)ရပ်ကွက်နဲ့ ကာနန်ရွာက ဘုန်းကြီးကျောင်းတစ်ကျောင်းအပါအဝင် အရပ်သားနေအိမ် ၂၀ လုံးထက်မနည်း ပျက်စီးသွားတယ်လို့ သိရပါတယ်။
“တမူးမြို့ထဲက ပျက်စီးသွားတဲ့ နေအိမ်ဆို ရစရာမရှိအောင် ပျက်စီးသွားတယ်။ ကာနန်ရွာက ဘုန်းကြီးကျောင်း အတော်လေး ပျက်စီးသွားတယ်။ လောလောဆယ် ပျက်စီးတဲ့ နေအိမ်က ၂၀ လုံးလောက် ရှိမယ်။ ဒီထက်လည်း များလာနိုင်တယ်” လို့ ခမ်းပတ်မြို့ခံတစ်ဦးက ရွှေဖီမြေသို့ ပြောပါတယ်။
ကာနန်ရွာကို စစ်တပ်က ပြီးခဲ့တဲ့ ၂၀၂၄ ခုနှစ် ဇန်နဝါရီ ၇ ရက်ကလည်း လေကြောင်းကနေ ဗုံးကြဲတိုက်ခိုက်လို့ ကလေးအပါအဝင် အရပ်သား ၁၇ ဦး သေဆုံးခဲ့ပြီး ၁၉ ဦး ထိခိုက်ဒဏ်ရာ ရရှိခဲ့ပါတယ်။
ခမ်းပတ်မြို့ကိုတော့ တော်လှန်ရေး တပ်ဖွဲ့တွေက ပြီးခဲ့တဲ့ ၂၀၂၃ ခုနှစ် နိုဝင်ဘာ ၇ ရက်မှာ သိမ်းပိုက်ရရှိခဲ့ပါတယ်။
