မာည်းရူပ၊ ဒီဆဲမ်ဘာ ဆငည်း 16၊ မိုဂူႈ
ကဝ်အီနံပ်ဘည်ခူရ်က္လာည်းအရာပ်ကဲ က္လာင်းတဖုင်ဆျှိုည်ဖီမျေဒါႈ ဂေါႇပ်ုန်လီပ်ကဇောည်ဒဲႈခယ်ကဲ တံပ်ကညာအာဏာဆီုက်ဇေဝ်ကဲ လီပ်ဟာဝ်းဖါ်ႈခေဲင်ကီုင်းမိုဂူႈ ကပီုန်ဒါင်းမန်တလေးနီန် ပနိုက်ဟာဝ်းဘိုး ရဲင်ဘ္လောမ်ဆီုက်ကဲအောႏ။
ကဲဒါႈ ခည်ကျံရ်ဒီဆဲမ်ဘာ ဆငည်း 14 ဒိူန် တံပ်ကညာအာဏာဆီုက်ဇေဝ်ကဲ ဇူႈဒေဒါ တောပ်ဒေင်နောင်ခေဝ် – ပျီန်အူလူန်နီန် ပနိုက်ဟာဝ်းဖါ်ႈ ရဲင်ဘ္လောမ်ဆီုက်နီန် ဆဲႈဒီန် ပရဝ်အ်ုန်အီဂေါည်တောပ်ဒေင် နောင်ခေဝ် – မိုဂူႈနီန်စီ ကဲပ္လေႈအူန်းတံပ်ကဲအောႏ။
ကဝ်အီဒဲႈဆဒါင်ခေဲင်အရာပ်နီန်အူအီး က္လာင်းတဖုင်ဆျှိုည်ဖီမျေဒါႈ “ ဘံန်အမှိူဝ်ဒိူန် ကဲဇူႈကဒါႇ လယ်ကြီးနီန် လီပ်ဒေဲႈခေဲင်မိုဂူႈ။ ကဒါႇတောင်နီမာ် ကဲပနိုက်အူန်းဘိုး ရဲင်ဘ္လောမ်ကဲ။ အဒိူဝ်မာ် ကဲဇူႈကဒါႇ 5 မဲင် ဒီလေႈနှာရိူဝ်ႇကီုင်းမိုဂူႈနီန် ထိုးဟာဝ်းကဒါႇဂေါည် တံပ်လံပ်တီုက်ႎှီုန်းကဲ”။
အ်ုန်ဆီုပ်ဒါႈဘိုး ကဇေန်နီး ခေဲင်ကီုင်းမိုဂူႈနီန် ရဲင်ဘ္လောမ် တံပ်ကညာအာဏာဆီုက်ဇေဝ်ကဲ ဂေါည်ပွံတ်ဒါဟြဲင် ဆဲႈဒီန် တောပ်ပည်ဗျုဟာမိုဂူႈနီန် ပယုင်ဆနံမ်ဒါင်း၊ ပါင်ပ္လေခ္လုင် ကာည်း ပကျောင်ပနောဘေဲႇမာ် ကဲပ္လေႈအူန်းတံပ်ကဲအောႏ။
ခည်ကျံရ်ဒီဆဲမ်ဘာ ဆငည်း 14 ဒိူန်မာ် တံပ်ကညာအာဏာဆီုက်ဇေဝ်ကဲ ကာည်း တံပ်လံပ်တီုက်ႎှီုန်းကဲ ပဲန်ဟာဝ်းပ္လေါည်ကတီုက်ကပဲင် ရီမ်းပြောမိုဂူႈကဒါႇလေႈဆာင်ငည်း ပရဝ်ဆတ်အင်းပြန့်နီန်အောႏ။
ရဒေင်မိုဂူႈ – ပျီန်အူလူန်၊ ဒေင်မိုဂူႈ – မိူင်မီတ်နီန်မိုႈ တံပ်ကညာအာဏာဆီုကဇေဝ်ကဲ ထိင်ခြဲ ဆာ်မိုႈနှာရိူဝ်ႇကီုင်းမိုဂူႈ ကာည်း ဒီရ်ဟံရ်မိုႈ တံပ်လံပ်တီုက်ႎှီုန်းကဲ ထိင်ခြဲဟာဝ်းအောႏ။
တံပ်ကညာအာဏာဆီုက်ဇေဝ်ကဲ လီပ်ဒေဲႈခေဲင်ကီုင်းမိုဂူႈနီန် ဟည်ဘိူန်း 2 နှား ကံပ်ရောတ်ကဇေန်နီး ကဲညှံမ်စိဒေရေဲန် ဇီုင်းကာန်ဘြောင်ချှာင်ကဲ တိုအီးအရာပ်ခည်ဂီုန်းမာ် ညှံမ်ဘယ်စိ ႎီရ်ဒေဲႈ ဆီုင်ဂီုည်ဒဝ်ဟာဝ်းဒီလောတ်ဖေးအောႏ။
အမှိူဝ် ကျံရ်ဒီဆဲမ်ဘာ ဆငည်း 11 ကဝ်အီဘိူန်းအခွါင်းအရေးကြောႈက္လာင်းခေဲင် NUG အ်ုန်အီမိုႈ ဉီးနေဘုန်းလက်နီန်ဒါႈ ကဲနံင်ဆီုပ်တီုက်ဟာဝ်း တံပ်ကညာအာဏာဆီုက်ဇေဝ်ကဲအီ လီပ်ဒေဲႈခေဲင်ကီုင်းမိုဂူႈ ကာည်း မိူင်မီတ်နီန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
#ရူပ်ရာင် – Local
~ ~ ~
ဆဒါင်ဖုင်ယဲဆျှိည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
