ပို;လဘား၊ ဒီဆဲမ်ဘာ ဆငည်း 13၊ နံမ့်ဖကာ
ကောန်အီပ်ုန် ကဝ်အီနံပ်ဘည်မိုႈဘည်ဘာည်းနီန် က္လာင်းတဖုင်ဆျှိုည်ဖီမျေဒါႈ တံပ်ပလိက်တအာင်းကဲ ဘိူန်းဒေတိုည်းဟာဝ်း ကောန်အီမာည်း ကဝ်အီက္လဟာဝ်း ဂါရ်အူပီးအူမေဲန် အီဂေါည်ပနံမ့်ဖကာ ပလှံင်အေဲက်ကိုက်နီန်အောႏ။
ကဝ်အီမိူဝ်ႈဇီုင်ကပ္လိူင်ခေဲင်တံပ်ပလိက်တအာင်းကဲအူအီး က္လာင်းဒါႈ တံပ်ပလိက်တအာင်း အ်ုန်အီဂေါည်ပနံမ့်ဖကာ ခေဲင်လှံင်အေဲမ်ကိုက်ကဲ ဟာဝ်တိုည်း ကောန်အီမာည်းဒီန် ခည်ကျံရ်ဒီဆဲမ်ဘာ ဆငည်း 8 ဒိူန် ကဇေန်နီး ကဲဆီုင်ဂီုည်စေတ်မေန်းဟာဝ်းအ်ုန်အောႏ။
ကဲဒါႈ “ ကံပ်ရောတ်ကဇေန်နီး ကဲဆီုင်ဂီုည်တိုည်းအူန်းလိူည်အ်ုန် စီစေတ်မေန်းဟာဝ်းအ်ုန်။ အ်ုန်ဂီုည်ဒါးလိူည် အာဝ်မိုႈအ်ုန်အီရေဲန်။ ကံပ်ရောတ်ကဇေန်နီး အ်ုန်ညှံမ်ခါမ်စီဒါႈမိုႈအ်ုန်။ မှောဘည်မှဲ့မာ် ဂီုည်ဒါႈလိူည်အာဝ်နံပ်။ အူပီးအူမေဲန် ဂါရ်အီကတူႈက္လဒိူန်စီဒါႈ မိုႈလိူည်အ်ုန်။ ယဲမာ်ကအာ်မ်းအေ့ ငါည်အ်ုန်”
ကောန်အီမာည်းဒီန် ဆီုပ်က္လာင်းဒါႈဘိုး တံပ်ပလိက်ကုင်တအာင်းကဲဒါႈ ကဒါႇကဲမာ် နံင်တိူဝ်ႈဟာဝ်းအရေး တောပ်ဘည်ဥပဒေနီန် တကောန်အီမာည်း ကဝ်အီလူည်ႇအမှုဒီန်အောႏ။
ဂါရ်အူပီးအူမေဲန် ကတူႈအီးက္လဟာဝ်း ခည်ကျံရ်ဒီဆဲမ်ဘာ ဆငည်း 2 ခိင်ဆံန်ကပံတ် 3နြီဒိူန် ခိင်ယိူဝ်ႇဂါရ် ပဂီုင်ႎီရ်ဒေဲႈနီန်အောႏ။
ကောန်အီပ်ုန်ကဝ်အီဒါႈ ရကဗိုည်နီန်ဆီုပ်ဒါႈဘိုး ကဇေန်နီး ဂါရ်အူပီးအူမေဲန်နီန် ရံပ်ခါမ်ဘည်ဆနံမ်း ပယုင်ဆနံမ်ဒါင်းလှံင်အေဲမ်ကိုက် ကနာည်နံင်ဆနံမ်းဂါရ်မာ် ကဲလိုရိူန်းပ်ုန်ကဇောည်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
