မိုင်းရူပ၊ ဇန်နဝါရီ ၁၇ ရက်၊ ဒီးမော့ဆို
ကရင်နီပြည် ဒီးမော့ဆိုမြို့နယ်ရှိ စစ်ရှောင်စခန်းမှာ စစ်ကောင်စီတပ်က လက်နက်ကြီးနဲ့ လေကြောင်း တိုက်ခိုက်မှုကြောင့် အရေးပေါ် ဗုံးခိုကျင်း တူးနေရတယ်လို့ စစ်ရှောင်တွေက ရွှေဖီမြေကို ပြောပါတယ်။
ဇန်နဝါရီလအတွင်း ဒီးမော့ဆိုမြို့နယ်ရှိ စစ်ရှောင်စခန်းမှာ လွိုင်ကော်မြို့အခြေစိုက် စစ်တပ်က လက်နက်ကြီးနဲ့ နေ့စဥ်လိုလို ပစ်ခတ်နေတယ်လို့ ဒီးမော့ဆိုအနောက်ခြမ်းရှိ စစ်ဘေးရှောင် အမျိုးသမီးတစ်ဦးက ပြောပါတယ်။
“သူတို့ လက်နက်ကြီး ထုတာက ကျမတို့နေတဲ့ တဲအထိတောင် တုန်ခါတယ်။ ကလေးတွေ၊ လူကြီးတွေရှိတော့ ထပ်မရှောင်နိုင်တော့ဘူး။ အဲကြောင့် ကတုတ်ကျင်းတွေ တူးထားတာ”
ကတုတ်ကျင်းကို မိသားစုအလိုက် တူးကြတာဖြစ်ပြီး ကတုတ်ကျင်းတစ်ခုကို အနည်းဆုံး ၅ သိန်းကျပ်အထိ ကုန်ကျတယ်လို့လည်း သူမက ဆက်ပြောပါတယ်။
ပြီးခဲ့တဲ့ ဇန်နဝါရီ ၁၄ ရက်မှာ ဒီးမော့ဆိုအရှေ့ခြမ်းရှိ စစ်ရှောင်စခန်းတစ်နေရာကို စစ်တပ်က လေကြောင်းကနေ ပေါင် ၂၀၀ ဗုံး ကြဲချတိုက်ခိုက်ခဲ့တာကြောင့် ၃ ဦး သေဆုံးပြီး ၄ ဦး ဒဏ်ရာ ရခဲ့ပါတယ်။
ပြီးခဲ့တဲ့ ဇန်နဝါရီ ၁ ရက်မှာလည်း ဒီးမော့ဆိုအနောက်ခြမ်းကို စစ်တပ်က ဂျက်လေယာဥ်နဲ့ ၃ ကြိမ် ဗုံးကြဲတိုက်ခိုက်ခဲ့ပါတယ်။
တိုးတက်သော ကရင်နီ ပြည်သူ့အင်အားစု- PKPF ရဲ့ စာရင်းအရ စစ်အာဏာသိမ်းပြီး ၄ နှစ်နီးပါးအတွင်း ကရင်နီပြည်မှာ လေကြောင်း တိုက်ခိုက်မှု ၁,၇၆၅ ကြိမ် ပြုလုပ်ခဲ့တယ်လို့ ပြီးခဲ့တဲ့ ဇန်နဝါရီ ၁ ရက်မှာ ထုတ်ပြန်ထားပါတယ်။
