ရွှေဖီမြေ၊ ဒီဇင်ဘာ ၁၃ ရက်၊ လယ်ဒို
စစ်ကောင်စီတပ်ရဲ့ လေကြောင်းတိုက်ခိုက်မှုနဲ့ လက်နက်ကြီးပစ်ခတ်မှုကြောင့် ကရင်အမျိုးသားအစည်းအရုံး (KNU) ထိန်းချုပ်နယ်မြေက ဦးဇင်းတစ်ပါးနဲ့ အရပ်သား ၃ ဦးထိမှန်သေဆုံးပြီး ကလေးတစ်ဦး ဒဏ်ရာရခဲ့တယ်လို့ KNU က ဒီနေ့ ဒီဇင်ဘာ ၁၃ ရက်မှာ ထုတ်ပြန်ထားပါတယ်။
ပြီးခဲ့တဲ့ ဒီဇင်ဘာ ၁၁ ရက်ညမှာ စစ်ကောင်စီတပ်က ခလယ်လွီထူ(ညောင်လေးပင်)ခရိုင် လယ်ဒိုမြို့နယ် လိန်ပင်ကျေးရွာကို ဂျက်ဖိုက်တာနဲ့ ပေါင် ၅၀၀ ဗုံးသီးတစ်လုံး ကြဲချခဲ့တာကြောင့် အသက် ၄၆ နှစ်အရွယ် စောဖားဟော်ဆိုသူ ထိမှန်သေဆုံးခဲ့တာဖြစ်လို့ ဆိုပါတယ်။
အလားတူ စစ်ကောင်စီရဲ့ နတ်သံကွင်းအထိုင်တပ်ကနေ ရွှေခဲစုကျေးရွာကို ၁၂၀ မမ လက်နက်ကြီး ၃ လုံးနဲ့ ပစ်ခတ်ခဲ့တာကြောင့် အသက် ၄၇ နှစ်အရွယ် ဒေါ်ထွေးထွေးဆိုသူ ထိမှန်သေဆုံးခဲ့ပြီး နေအိမ် ၃ လုံးလည်း ထိမှန်ပျက်စီးခဲ့တယ်လို့ ဖော်ပြထားပါတယ်။
ပြီးခဲ့တဲ့ ဒီဇင်ဘာ ၈ ရက်မှာလည်း စစ်ကောင်စီတပ်က စက်တပ်လေထီး နဲ့ ကျောက်စရစ်အနောက်ဖက်ကမ်း ကျေးရွာကို လာရောက်ပစ်ခတ်ခဲ့တာကြောင့် သက်တော် ၇၈ နှစ်အရွယ် ဦးဇင်း ဦးစန္ဒိမာ ထိမှန်ပျံလွန်တော်မူသွားသလို အသက် ၇၆ နှစ်အရွယ် ဒေါ်စိန်မြိုင် ထိမှန်သေဆုံးခဲ့ပြီး အသက် ၁၃ နှစ်အရွယ် မောင်နေဇော်အောင် ထိမှန်ဒဏ်ရာရခဲ့ပါတယ်။
ဒါ့အပြင် အဲဒီနေ့မှာပဲ စစ်ကောင်စီတပ်ဟာ နတ်သံကွင်းကနေ ကျောက်စရစ်အရှေ့ဘက် ကမ်းကျေးရွာဆေးပေးခန်းကို ဒရုန်းနဲ့ ၂ ကြိမ်ဗုံးကြဲခဲ့တာကြောင့် ဆေးပေးခန်း ၁ လုံးထိမှန်ပျက်စီးခဲ့တယ်လို့ KNUက ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
