မိုင်းဖိူမ်းဆငဲ၊ ဒီဆဲမ်ဘာ ဆငည်း 12၊ မိုဂူႈ
ကဝ်အီကဒံပ်တောပ်ရမာကဲ က္လာင်းတဖုင်ဆျှိုည်ဖီမျေဒါႈ ဒီဗီရ်ထိင်ခြဲ တံပ်ကညာအာဏာဆီုက်ဇေဝ်ကဲတ ခေဲင်လှံင်မိုဂူႈနီန် ကောန်ဆီုက်တံပ်ကညာအာဏာဆီုက်ဇေဝ် ကဲအီရဲ့ဂေတ်ကဲ တိုည်းဟာဝ်းတိုအီး လီဆူ ရဝ်ပိန်းပြစ်ကဲ 3 အီးအောႏ။
ဘည်မိုႈဘည်ဘာည်းအ်ုန်မိုႈ ခည်ကျံရ်ဒီဆဲမ်ဘာ ဆငည်း 2 ဒိူန် ကဝ်အီဟာဝ်းပက္လာႈမိုဂူႈ အ်ုန်အီဇီုဝ် ဦးသိန်းလေး ဘိူန်းအဆာက် 53 ဆန်ုမ် ကာည်း ဦးဆီမီး အဆာက် 45 ဆန်ုမ်၊ မောင်ဇီးဆီး အဆာက် 22 ဆန်ုမ်နီန် ခိင်ဗီရ်ဒေဲႈကဲ ပရဝ်ပိန်းပြစ်နီန် ကတူႈကဲတိုည်းဟာဝ်းအောႏ။
ကဝ်အီကဒံပ်တောပ်ရမာကဲအူအီးက္လာင်းဒါႈ “ ပမိုဂူႈနီန် ခြိူဝ်းယဲကတူႈတိုည်း။ အီတိုည်းဟာဝ်းမိုႈ တံပ်ကညာအာဏာဆီုက်ဇေဝ်ကဲ။ အာဝ်ဘိူန်းနံပ်စိ မှောကဲဘာည်း။ မှောကဲတိုန်းအူန်းကဲမာ် အာဝ်နံပ်။ မိုႈကဲဟည်ယံမ်း ကဲဆီုင်ဂီုည်ဒါ့်ဂေါည်မာ်အာဝ်နံပ်၊ ကဲမိုႈလိူည်တိုအီးလီဆူ ဆေမာ်ကဲအာဝ်နံပ်”။
အ်ုန်ဆီုပ်က္လာင်းဒါႈဘိုး တိုအီးကဲအီကတူႈတိုည်းဟာဝ်းကဲဒီန် ကဲအာဝ်မိုႈစိ အီကဆီုဝ်ကဆဲင်တောပ်ဖုင်တံပ်ကဲ ဆဲႈဒီန် အာဝ်မိုႈစိအီရေဲန် လံပ်အရေးတီုင်ကုင်နီန် ကဲမိုႈလိူည်တိုအီးရဝ် ကဲအီရေဲန်ဟောမ်ပနောအောႏ။
ဘိူန်းအယ်နံပ်ကဲဒါႈ လောင်အီကဆီုဝ်ကဆဲင်တောပ် ပ်ုန်တိုည်းဟာဝ်းကဲ တိုအီးရဝ် 3 အီးနီန် တိုအီးဒါင်းပရဝ်ကဲ ဘိူည်ဟာဝ်းကယိူဝ်းတောပ် တံပ်ကညာအာဏာဆီုက်ဇေဝ်ကဲမာ် ဆဲႈဒါႇအာဝ်ဘိူန်းယိူဝ်းကဲ ကတူႈဘိုးကဲအေႈအောႏ။
ဂေါႇပ်ုန်လီပ်ကမိုန်ဒဲႈခယ်ကဲ တံပ်ကညာအာဏာဆီုက်ဇေဝ်ကဲ ဗီရ်လာည်းဟာဝ်းဖါ်ႈကီုင်းမိုဂူႈနီန်တ တံပ်ဆီုက်တအာင်း TNLA ကဲ ခည်ကျံရ်နိုဗဲမ်ညာ ဆငည်း 29 ဒိူန် ကဲစီဇူႈဒေလီပ်ဟာဝ်း ခေဲင်ကီုင်းမိုဂူႈအောႏ။
ဘံန်လီပ်ဟာဝ်းကဲခေဲင်ကီုင်း ဘံန်လှေင် 3 ဆငည်း ကျံရ်ဒီဆဲမ်ဘာ ဆငည်း 2 ဒိူန်ကဲတိုည်းဟာဝ်းပွံတ် တိုအီးအရာပ်ကဲ 3 အီးဂေါႇအမှုအာဝ်ဆံင်ခါနီန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
