ယာရူစိင်၊ ဒီဇင်ဘာ ၁၂ ရက်၊ ကျောက်ဖြူ
အရက္ခတပ်တော်(AA)ထိန်းချုပ်ထားတဲ့ ရခိုင်ပြည် မြောက်ဦးမြို့ ဆေးရုံကို ဗုံးကြဲပြီး နောက်တစ်ရက် ရခိုင်ပြည် ကျောက်ဖြူမြို့နယ်ထဲကိုလည်း စစ်ကောင်စီတပ်က လေကြောင်းကနေ ထပ်မံ ဗုံးကြဲတိုက်ခိုက်တာကြောင့် ဒေသခံ ၈ ဦးသေဆုံးပြီး ၁၀ ဦးထက်မနည်း ဒဏ်ရာရရှိခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဒီဇင်ဘာ ၁၁ ရက် ည ၇ နာရီ ၃၄ မိနစ်မှာ ကျောက်ဖြူမြို့နယ် ငလုံးစုံအထက်ကျေးရွာနဲ့ အောက်ကျေးရွာကို စစ်ကောင်စီတပ်က လေကြောင်းကနေ ပေါင် ၅၀၀ ဗုံး ၂ လုံးကြဲချတိုက်ခိုက်ခဲ့တယ်လို့ ဆိုပါတယ်။
“အဲဒေသတွေမှာက တိုက်ပွဲမဖြစ်ပါဘူး။ သေဆုံးတာက များပါတယ်။ ဒဏ်ရာရတဲ့ထဲလည်း ဒဏ်ရာပြင်းထန်သူတွေလည်း များပါတယ်။ လက်ရှိအချိန်ထိတော့ ဒဏ်ရာရသူ ၈ ဦးထိရှိတယ်လို့ သိရပါတယ်”လို့ ဒေသခံအမျိုးသားတစ်ဦးက ပြောပါတယ်။
စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် အမျိုးသားနဲ့ အမျိုးသမီး ၈ ဦးသေဆုံးခဲ့ရပြီး ဒဏ်ရာရသူ ၁၀ ဦးခန့်ရှိတယ်လို့ အရက္ခတပ်တော်- AA ရဲ့ ထုတ်ပြန်ချက်အရ သိရပါတယ်။
ပြီးခဲ့တဲ့ ဒီဇင်ဘာ ၁၀ ရက် ည ၉ နာရီ ၁၃ မိနစ်မှာ တိုက်ပွဲဖြစ်ပွါးခြင်းမရှိပဲ အရပ်သားတွေ ဆေးကုသတဲ့ မြောက်ဦးမြို့ဆေးရုံကြီးကို စစ်ကောင်စီတပ်က လေကြောင်းကနေ ပေါင် ၅၀၀ ဗုံး ၂လုံး ကြဲချတိုက်ခိုက်ခဲ့တာကြောင့် ဆေးရုံကြီးက တာဝန်ကျတဲ့ ဆရာမတချို့အပါအဝင် ဒေသခံ ၃၄ ဦးသေဆုံးခဲ့ပြီး ဒဏ်ရာရသူ ၈၀ နီးပါးအထိ ရှိခဲ့ပါတယ်။
ရွှေဖီမြေက ရရှိထားတဲ့ စာရင်းအရ ပြီးခဲ့တဲ့ နိုဝင်ဘာ ၇ ရက်ကနေ နိုဝင်ဘာ ၂၈ ရက်အထိ ရခိုင်ပြည်နယ်က မင်းပြား၊ ပုဏ္ဏားကျွန်း၊ ရသေ့တောင်နဲ့ ကျောက်တော် စတဲ့မြို့နယ်မှာ စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် ဒေသခံ ၂၀ ဦး သေဆုံးခဲ့ရပြီး ၃၀ ဦးထက်မနည်း ထိမှန်ဒဏ်ရာ ရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
