မိုင်းရူပ၊ ဒီဇင်ဘာ ၁၂ ရက်၊ မိုးကုတ်
တရုတ်နိုင်ငံရဲ့ကြားဝင်မှုနဲ့ စစ်ကောင်စီလက်အောက်ပြန်ရောက်သွားတဲ့ မိုးကုတ်မြို့မှာ ဆေးရုံအတွင်း တပ်စွဲထားတဲ့ စစ်ကောင်စီတပ်ကို တော်လှန်ရေးတပ်တွေက ဒရုန်းနဲ့ ဗုံးကြဲခဲ့တယ်လို့ ရွှေဖီမြေက စုံစမ်းသိရှိရပါတယ်။
မနေ့ ဒီဇင်ဘာ ၁၁ ရက် ညနေပိုင်းမှာ စစ်ကောင်စီတပ်တပ်စွဲထားတဲ့ မိုးကုတ်ဆေးရုံနဲ့ ဆေးရုံအနီးတစ်ဝိုက်ကို တော်လှန်ရေးတပ်တွေက ဒရုန်းနဲ့ ဗုံး ၆ လုံး ကြဲချတိုက်ခိုက်ခဲ့တယ်လို့ မြေပြင်သတင်းအရင်းမြစ်တစ်ဦးက ပြောပါတယ်။
“စကစဘက်က ဆေးရုံမှာနေရာဝင်ယူထားတာ။ အဲနေရာကို ကြဲတာ။ ဒရုန်းနဲ့ ၆ လုံးကြဲတာ” လို့ ဆိုပါတယ်။
ဒရုန်းနဲ့ ဗုံးကြဲတိုက်ခိုက်မှုကြောင့် စစ်ကောင်စီရဲ့ ထိခိုဒီသေဆုံးမှုကို မသိရသေးဘဲ မိုးကုတ်မြို့ပြင်နေရာတွေမှာတော့ စစ်ကောင်စီနဲ့ တော်လှန်ရေးတပ်တွေအကြား ထိတွေ့တိုက်ပွဲတွေ ဆက်ဖြစ်နေတယ်လို့ သူကဆက်ပြောပြပါတယ်။
ပြင်ဦးလွင်- မိုးကုတ်၊ မိုးကုတ်- မိုးမိတ်လမ်းပိုင်းကို စစ်ကောင်စီတပ်က ထိန်းချုပ်ထားပြီး တခြားမြို့ပြင်ကနေရာတွေကိုတော့ တော်လှန်ရေးတပ်တွေက ထိန်းချုပ်ထားတာ ဖြစ်ပါတယ်။
မိုးကုတ်မြို့တွင်းကို စစ်ကောင်စီတပ်ပြန်ဝင်လာတာ ၂ ပတ်နီးပါရှိလာပြီဖြစ်ပြီး လက်ရှိအချိန်အထိ အုပ်ချုပ်ရေးလုပ်ငန်းတွေ ပြန်မစနိုင်သေးသလို မြို့ခံအများစုလည်း နေရပ်ပြန်မလာနိုင်သေးပါဘူး။
မြို့အဝင်အထွက်နေရာတွေကိုတော့ ဒေသခံတွေကို စစ်ကောင်စီဘက်က ဖြတ်သန်းသွားလာခွင့်ပြုပေမယ့် စစ်ဆေးမှုတင်းကြပ်တယ်လို့ မြို့ခံတွေက ပြောပါတယ်။
စစ်ကောင်စီတပ်ဟာ တရုတ်နိုင်ငံရဲ့ ကြားဝင်မှုနဲ့ ပြီးခဲ့တဲ့ နိုဝင်ဘာ ၂၉ ရက်နဲ့ ၃၀ ရက်မှာ တအာင်းတပ်မတော်- TNLA ထိန်းချုပ်ထားတဲ့ မိုးမိတ်နဲ့ မိုးကုတ်မြို့ထဲကို ဝင်ရောက်လာတာ ဖြစ်ပါတယ်။
မိုးကုတ်အခြေစိုက် တော်လှန်တပ်တွေဖြစ်တဲ့ မိုးကုတ်ဗျုဟာ၊ မန္တလေး PDF ၊မိုးကုတ်ပြည်သူ့ကာကွယ်ရေးအဖွဲ့နဲ့ စတဲ့တော်လှန်ရေးတပ်တွေက မိုးကုတ်မြို့ကို ဆက်လက်ကာကွယ်သွားမယ်လို့ ထုတ်ပြောထားပါတယ်။
မိုးကုတ်နဲ့ မိုးမိတ်ကို ဝင်ရောက်လာတဲ့ စစ်ကောင်စီတပ်ကို တိုက်ခိုက်သွားမယ်လို့ အမျိုးသားညီညွတ်ရေးအစိုးရ- NUG ရဲ့ ပြောရေးဆိုခွင့်ရှိသူ ဦးနေဘုန်းလက်က မနေ့ ဒီဇင်ဘာ ၁၁ ရက်မှာ ပြောကြားထားပါတယ်။
#ဓာတ်ပုံ – Local
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
