ယာရူစိင်၊ ဒီဇင်ဘာ ၁၁ ရက်၊ မြောက်ဦး
အရက္ခတပ်တော်(AA)ထိန်းချုပ်ထားတဲ့ ရခိုင်ပြည် မြောက်ဦးမြို့ ဆေးရုံကြီးပေါ်ကို စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် ဆေးကုနေတဲ့ ဒေသခံ ၃၁ ဦးသေဆုံးခဲ့ပြီး ၆၀ ကျော် ထိမှန်ဒဏ်ရာရရှိခဲ့တယ်လို့ မြောက်ဦးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဒီဇင်ဘာ ၁၀ ရက် ည ၉ နာရီ ၁၃ မိနစ်မှာ တိုက်ပွဲဖြစ်ပွါးခြင်းမရှိပဲ မြောက်ဦးမြို့ရှိ ဆေးရုံကြီးကို စစ်ကောင်စီတပ်က လေကြောင်းကနေ ပေါင် ၅၀၀ ဗုံး ၂လုံး ကြဲချတိုက်ခိုက်ခဲ့တယ်လို့ ဆိုပါတယ်။
“သေဆုံးတဲ့သူတွေလည်း အရမ်းများပါတယ်။ သူနာပြု ဆရာ ဆရာမတွေပါ ပါသွားတယ်။ ဒဏ်ရာရတဲ့ သူတွေလည်း များတယ်။ ဒဏ်ရာရတဲ့ထဲက ပြင်းထန်တဲ့သူတွေလည်း အများကြီးရှိပါတယ်။ သေဆုံးသူတွေလည်း ထပ်တိုးနိုင်ပါတယ်”လို့ မြောက်ဦးမြို့ခံ အမျိုးသားတစ်ဦးက ပြောပါတယ်။
စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် အမျိုးသား ၁၅ ဦးနဲ့ အမျိုးသမီး ၁၆ ဦးသေဆုံးခဲ့ရပြီး ဒဏ်ရာရသူ ၅၁ ဦးအထိရှိတယ်လို့ အရက္ခတပ်တော်- AA ရဲ့ ထုတ်ပြန်ချက်အရ သိရပါတယ်။
ရွှေဖီမြေက ရရှိထားတဲ့ စာရင်းအရ ပြီးခဲ့တဲ့ နိုဝင်ဘာ ၇ ရက်ကနေ နိုဝင်ဘာ ၂၈ ရက်အထိ ရခိုင်ပြည်နယ်က မင်းပြား၊ ပုဏ္ဏားကျွန်း၊ ရသေ့တောင်နဲ့ ကျောက်တော် စတဲ့မြို့နယ်မှာ စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် ဒေသခံ ၂၀ ဦး သေဆုံးခဲ့ရပြီး ၃၀ ဦးထက်မနည်း ထိမှန်ဒဏ်ရာ ရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
