ရွှေဖီမြေ၊ ဇန်နဝါရီ ၁၆ ရက်၊ မိုင်းရယ်
ရှမ်းမြောက် မိုင်းရယ်မြို့နယ် ကုန်းနင်းကျေးရွာမှာ ဘက်ထရီအိုး ပေါက်ကွဲပြီး မီးလောင်မှု ဖြစ်ပွားခဲ့ရာ လသားကလေးငယ်တစ်ဦးနဲ့ ၂ နှစ်အရွယ် ကလေးငယ်တစ်ဦး သေဆုံးခဲ့တယ်လို့ ရှမ်းပြည်တိုးတက်ရေးပါတီ- SSPP/SSA က ထုတ်ပြန်လာပါတယ်။
ဖြစ်စဉ်ဟာ မနေ့ ဇန်နဝါရီ ၁၅ ရက် နေ့လယ် ၂ နာရီခန့်က ကုန်းနင်းရွာက နေအိမ်တစ်ခုမှာ ဘက်ထရီအိုး ပေါက်ကွဲပြီး မီးလောင်မှု ဖြစ်ပွားခဲ့တာကြောင့် နေအိမ်တစ်ခုလုံး ပြာကျခဲ့ပြီးတော့ အိမ်ထဲ ရှိနေတဲ့ ၂ နှစ်သားကလေးငယ်နဲ့ ၂ လသား ကလေးငယ်တစ်ဦး မီးလောင်ပြီး သေဆုံးခဲ့တာလို့ ဆိုပါတယ်။
မိခင်ဖြစ်သူက ဟင်းချက်ဖို့ ပိန္နဲသီး သွားခူးနေပြီး ဖခင်ဖြစ်သူကတော့ ခြံထဲ အလုပ် လုပ်နေစဉ် အိမ်ထဲ သွင်းထားတဲ့ ဘက်ထရီအိုး ပေါက်ကွဲရာမှ မီးလောင်မှု ဖြစ်ပွားခဲ့တာလို့ ဆိုပါတယ်။
နေအိမ်ထဲ မီးလောင်နေစဉ် အိမ်ရှင်ဖြစ်သူက မီးလောင်တာကို သိတဲ့အချိန်မှာ မီးလောင်အား ပြင်းတာကြောင့် ကလေးကို မကယ်နိုင်ခဲ့ဘူးလို့ ထုတ်ပြန်ချက်ထဲ ဖော်ပြထားပါတယ်။
အလားတူ ပြီးခဲ့တဲ့ ဇန်နဝါရီ ၉ ရက်ကလည်း တအာင်းတပ်မတော်- TNLA ထိန်းချုပ်ထားတဲ့ နမ့်ခမ်းမြို့နယ် နမ့်စိတ်ကျေးရွာမှာ အိမ်ရှင်ဖြစ်သူက အသုဘ သွားနေစဉ် ဝိုင်ယာကြိုး ရှော့လ်ဖြစ်ပြီး မီးလောင်မှု ဖြစ်ပွားခဲ့ပါတယ်။
