ရဲမာန်၊ ဒီဇင်ဘာ ၁၀ ရက်၊ ချောင်းဦး
စစ်ကိုင်းတိုင်း ချောင်းဦးမြို့နယ် ကျီးကုန်းရွာက အဘိဝံသဘွဲ့ရ ဆရာတော်တစ်ပါးနဲ့ အခြားသံဃာတော်တစ်ပါးအပါဝင် ၅ ဦးကို စစ်ကောင်စီတပ်က သတ်ဖြတ်သွားခဲ့တယ်လို့ Monywa Revolution -MR က တာဝန်ရှိသူတစ်ဦးက ရွှေဖီမြေကို ပြောပါတယ်။
ကျီကုန်းကျောင်းသစ်ကျောင်းမှာ သတင်းသုံးတော်မှုနေတဲ့ ဦးသုမနာဘိဝံသဟာ ကိုယ်တစ်ခြမ်းသေနေတဲ့ဘုန်းကြီးတစ်ပါးဖြစ်တယ်လို့ ၎င်းက ဆိုပါတယ်။
“ပစ်သတ်ခံရတာတော့ ၈ရက်နေ့ည သို့မဟုတ် ၉ရကါနေ့မှာ ဖြစ်ပါတယ်။ သတ်ခံရတာကိုတော့ မနေ့ကမှ သိတာပါ။ မန္တလေး မစိုးရိမ်ကျောင်းတိုက်မှာ နေခဲ့တဲ့ ဆရာတော်ပါ။ ဆရာတော်က ကိုယ်တစ်ခြမ်းသေနေတာပါ။ ဆရာတော်ပြုစုနေသူနဲ့ အခြား ပြည်သူနှစ်ဦးကိုပါ သတ်သွားတာပါ”
စစ်ကောင်စီတပ်က မကျီးကုန်းရွာကို ၁၁ ရက်ကြာတပ်စွဲထားပြီး ဒေသခံတွရဲ့ နေအိမ်တွေကိုပါ ၆ ကြိမ်မြောက် မီးရှို့နေခဲ့တာဖြစ်တယ်လို့ ၎င်းက ဆိုပါတယ်။
“မီးရိူးခံရတာလဲ အိမ်ခြေကတော့ အတော်များနေပြီ။ဘယ်နှစ်အိမ်လဲတော့ အတည်မပြုနိုင်သေးဘူး။ ဒီဇင်ဘာ ၂ ရက်နေ့ကစပြီးရှို့တာ။ ဒီနေ့နဲ့ဆို ၆ ကြိမ်ရှိပြီ။ စစ်ကောင်စီတပ်တွေက လူစိတ်မရှိကြတော့ဘူးဆိုတော့ ပြည်သူတွေအနေနဲ့ စစ်ကောင်စီတပ် စစ်ကြောင်းထိုးလာရင် အတက်နိုင်ဆုံး ရှောင်နိုင်အောင် ရှောင်ကြဖို့” ၎င်းက ဆက်ပြောပါတယ်။
ပြီးခဲ့တဲ့ နိုဝင်ဘာ ၃၀ ရက် ညပိုင်းမှာဘဲ စစ်ကောင်စီတပ်က ချောင်းဦးမြို့နယ် ကျီးကုန်းရွာကို စစ်ကြောင်းထိုးပြီး ကျီးကုန်းရွာက အသက် ၄၃ နှစ် အရွယ်ရှိ ကိုမင်းနိုင်ကို သတ်ဖြတ်သွားခဲ့တယ်လို့ သိရပါတယ်။
ကျီးကုန်းရွာမှာ အိမ်ခြေ ၁၀၀၀ ကျော်ရှိပြီး စစ်ကောင်စီတပ်ရဲ့ စစ်ကြောင်းကြောင့် ကျီးကုန်းရွာအပြင် ချောင်းဦးနယ်အနောက်ခြမ်းနဲ့ အမြင့်မြို့နီးက ရွာတွေ အကုန်စစ်ရှောင်နေရတယ်လို့ ၎င်းက ဆက်ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
