မာည်းရူပ၊ ကျံရ်ဒီဆဲမ်ဘာ ဆငည်း 8၊ မိူင်းမီတ်
ဘိူန်းအယ်နံပ်မိုႈတ တံပ်ကညာအာဏာဆီုက်ဇေဝ်ကဲ ပျောႈဟာဝ်းဖါ်ႈပ္လေဘျုင် ပရဝ်မြစ်ဆုံ လှံင်မိူင်းမီတ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်ခါင် – KIA ကာည်း တံပ်ကပိုမ်ကဲ စီပဲန်တိုအီးရဝ် ဟည်ယံမ်းဟာဝ်းပွံတ် ကပံတ် 10အီးအောႏ။
ခည်ကျံရ်ဒီဆဲမ်ဘာ ဆငည်း 6 ခိင်ညှာကပံတ် 9နြီဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဂျက် ပျောႈဟာဝ်းဖါ်ႈပ္လေဘျုင် ရီမ်းပြောဆဴင်အိုမ်ပျြံင်ထာတ် ကျော်ရတနာ အ်ုန်အီဂေါည်ပရဝ်မြစ်ဆုံနီန် တောပ်ပည်ကောန်ကညောမ်ကဲကာည်း ကောန်အီပ်ုန်အီဂေါည်တတိုဇံန် တိုအီးရဝ် ယံမ်းဟာဝ်းပွံတ် 9အီးအောႏ။
“အ်ုန်တောပ် ကောန်ကညောမ်အူအီးကာည်း ကောန်အီပ်ုန် အီဂေါည်တတိုဇံန်နီန်အူအီး။ ႎဲ့ကောန်ကညောမ်ဂါရ်အာရ်အီး ရႎိူဝ်ႈဟာဝ်းပွံတ်။ ကံန်အူအီး ယိူဝ်းလိူည်တိုအ်ုန်အူကဒည်။ ဆာ်မိုႈကဒါႇခြူမ် ဟည်တောပ်ဟာဝ်းအိုမ်နဒီ။ ကစုကပိုမ်တိုအီးယံမ်း 9အီး။ ဟောည်ႇဆံင်ကျိုယာ့်”
ဆဲႈဒါႇဒီန် ဂေါႇပ္လေဘျုင်ပ်ုန်ဒေဲႈပျောႈ တံပ်ကညာအာဏာဆီုက်ဇေဝ်ကဲ တိုအီးဘာတ်ကဲနီန် ဂီုန်းဖါ်ႈ ဆာ်မိုႈထာန်ဂေါည်ကဲ စဲင်စဲင်ဟြဟြ ညှံမ်နံပ်နှဲန်စိအောႏ။
ဘံန်ဟောည်ႇဘိူန်းႎီရ် တံပ်ကညာအာဏာဆီုက်ဇေဝ်ကဲ တကီုင်းမိုဂူႈ အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း – TNLA ကဲ တောပ်ပ်ုန်ကဇောည်ခယ် အီနီန်မိုႈ ဘည်ပျောႈဟာဝ်းတံပ်ကညာအာဏာဆီုက်ဇေဝ်ကဲ တပ္လေဘျုင် ခေဲင်လှံင်မိူင်းမီတ်နီန် လိူဝ်ႈအူယာ့်အောႏ။
ကဇေန်နီး ဘည်ထိင်ခြဲ တံပ်ကညာအာဏာဆီုက်ဇေဝ်ကဲတ ဒေင်မိုဂူႈကာည်း မိူင်းမီတ် ကဲဟည်ရောတ်စာ်မ်းဖါ်ႈ ဘံင်ဒေင်မိုဂူႈကာည်း တွင်းငယ် ရဝ်မန်းကျည်းပင် ဆာ်မိုႈဒေင်မိူင်းမီတ်ကာည်း မဘိမ်းနီန်မိုႈ KIA ကဲကာည်း တံပ်ကပိုမ်ကဲ အီထိင်ခြဲအူန်းအောႏ။
ခည်ကျံရ်ဒီဆဲမ်ဘာ ဆငည်း 3 ခိင်ဆိူမ် ကပံတ် 12နြီဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဂျက် ဒေဲႈပျောႈဟာဝ်းပ္လေ ပရဝ်ထင်းရှူး ရီမ်းကီုင်းမိုဂူႈ ကပီုန်ဒါင်းမာန်းတလေးနီန်အောႏ။
တံပ်ကညာအာဏာဆီုက်ဇေဝ်ကဲနီန် ကဲလီပ်ဒေဲႈခေဲင်ကီုင်းမိူင်းမီတ်ကာည်း မိုဂူႈ ကဲအီမိုႈဒီပ်ုန်ထိင်ခြဲအူန်း တံပ်ဆီုက်တအာင်း – TNLA ကဲ ခည်ကျံရ်နိုႎဲမ်ဘာ ဆငည်း 29ကာည်း ဆငည်း 30ဒိူန် တောပ်ပ်ုန်လီပ်ကမိုန်ဒဲႈခယ်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
