လွေးထွေး၊ ဒီဇင်ဘာ ၅ ရက်၊ မန္တလေး
မန္တလေးတိုင်း ချမ်းအေးသာစံမြို့နယ်ရှိ မန္တလေးဈေးချိုမှာ ရွေးကောက်ပွဲ ဆန့်ကျင်ကြောင်း ဆန္ဒပြခဲ့ပြီးနောက် လမ်းဘေးဈေးဆိုင် ၅၀ ကျော်ကို စစ်ကောင်စီတပ်နဲ့ရဲက ဖျက်ဆီးခဲ့ကြောင်း မြို့ခံ အမျိုးသမီးရဲ့ ပြောပြချက်အရ သိရပါတယ်။
ဒီဇင်ဘာ ၃ ရက် မနက် ၅ နာရီဝန်းကျင်က မန္တလေးဈေးချိုမှာ နွေဦးတော်လှန်ရေးခေါင်းဆောင်တချို့က ဦးဆောင်ကာ ပြောက်ကျားဆန္ဒ ပြခဲ့ပြီး ဒီဇင်ဘာ ၄ ရက် ညမှာ စစ်တပ်နဲ့ရဲက အင်အား ၃၀၀ ဝန်းကျင်နဲ့ ဖျက်ဆီးခဲ့တာပဲ ဖြစ်ပါတယ်။
မြို့ခံအမျိုးသမီးက “အဲဈေးဆိုင်တွေက ဆန္ဒပြသူတွေကို ကူညီပေးတာကြောင့်ဆိုပြီး ဖျက်ပစ်တာ။ အဖမ်းခံရသူလည်းရှိတယ်ပြောတယ်။ သေချာတော့ မသိရဘူး။ အဲနေရာတွေမှာ ဈေးရောင်းသူတွေက တစ်ရက်လုပ် တစ်ရက်စားတွေ ပိုများတယ်” လို့ ပြောပါတယ်။
သတင်းရေးသားချိန်အထိ ဈေးချိုထဲရှိ ဈေးဆိုင်နဲ့ ဈေးဝယ်သူတွေကို အကြမ်းဖက်လုပ်ငန်း မလုပ်ဖို့နဲ့ မပူးပေါင်းဖို့ စစ်တပ်က ပြောဆိုနေကြောင်း သူမက ဆက်ပြောပါတယ်။
၎င်းဆန္ဒပြပွဲကို ဦးဆောင်ခဲ့သူမှာ မန္တလေးသပိတ်ခေါင်းဆောင် ဒေါက်တာ တေဇာဆန်း၊ ရန်ကုန်သပိတ်က ကိုနန်းလင်းနဲ့ စစ်ကိုင်းသပိတ်က ကိုခန့်ဝေဖြိုးတို့က ဦးဆောင်ခဲ့တာကြောင့် စစ်တပ်က အပူတပြင်း ရှာဖွေစစ်ဆေးနေတာလို့လည်း သတင်းဌာနတွေမှာ ရေးသားထားပါတယ်။
အလားတူ မနေ့ ဒီဇင်ဘာ ၄ ရက်ကလည်း ၎င်းနေရာအပြင် လမ်းတွေနဲ့ လူအများစုဝေးတဲ့နေရာတွေမှာ စစ်တပ်နဲ့ အုပ်ချုပ်ရေးမှူးတွေက အဝင်အထွက် ပိတ်ထားပြီး ဆန္ဒပြသူတွေကိုရှာဖွေစစ်ဆေးတာတွေ လုပ်ဆောင်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
