မိုင်းရူပ၊ ဇန်နဝါရီ ၁၆ ရက်၊ ရပ်စောက်
ရှမ်းတောင် ရပ်စောက်မြို့နယ် ကျောက်ဂူဒေသမှာ စစ်ကောင်စီတပ်နဲ့ ဓနုတပ်တော်- DPLA တို့အကြား တိုက်ပွဲ ဆက်လက် ပြင်းထန်နေပြီး စစ်တပ်ရဲ့ လက်နက်ကြီးကြောင့် အရပ်သားတစ်ဦး ဒဏ်ရာရကာ နေအိမ် ၂ လုံး မီးလောင်ပျက်စီးခဲ့တယ်လို့ DPLA က ထုတ်ပြန်ထားပါတယ်။
ပြီးခဲ့တဲ့ ဇန်နဝါရီ ၁၄ ရက်မှာ စစ်တပ်ရဲ့ လက်နက်ကြီးကြောင့် ကျောက်ဂူဒေသရှိ နေအိမ် ၂ လုံး မီးလောင်ပျက်စီးခဲ့ကာ မနေ့ ဇန်နဝါရီ ၁၅ ရက်မှာလည်း စစ်ကောင်စီတပ်ရဲ့ လက်နက်ကြီးကြောင့် အရပ်သားတစ်ဦး ဒဏ်ရာ ရခဲ့ပါတယ်။
“တိုက်ပွဲကတော့ ကျောက်ဂူအနီးတစ်ဝိုက်မှာ ဖြစ်နေတာ။ နေအိမ် မီးလောင်တဲ့ကိစ္စကတော့ စစ်ကောင်စီရဲ့ လက်နက်ကြီးလို့ သိထားရတယ်ဗျ” လို့ DPLA ရဲ့ ပြောရေးဆိုခွင့်ရှိသူက ရွှေဖီမြေကို ပြောပါတယ်။
ဒီနေ့ ဇန်နဝါရီ ၁၆ ရက်မှာလည်း ကျောက်ဂူမှာ တိုက်ပွဲ ဆက်ဖြစ်နေပြီး စစ်တပ်ဘက်က လေကြောင်းနဲ့ တိုက်ခိုက်နေတယ်လို့ သိရပါတယ်။
ပြီးခဲ့တဲ့ ဇန်နဝါရီ လဆန်းပိုင်းကစပြီး ကျောက်ဂူဒေသမှာ စစ်တပ်နဲ့ DPLA တို့အကြား တိုက်ပွဲ ဖြစ်ပွားခဲ့တာဖြစ်ပြီး တိုက်ပွဲ ပြင်းထန်နေတာ ၂ ပတ်နီးပါး ရှိနေပြီ ဖြစ်ပါတယ်။
ကျောက်ဂူမှာ စစ်ကောင်စီရဲ့ အမြှောက်တပ် ၃၄၉ စခန်း အခြေစိုက်ထားတာဖြစ်ပြီး ရပ်စောက်-ကျောက်ဂူလမ်းဟာ တအာင်းတပ်မတော်- TNLA နဲ့ စစ်တပ်တို့အကြား တိုက်ပွဲ ပြင်းထန်နေတဲ့ တောင်းခမ်းရွာဘက် စစ်ကောင်စီတပ်က စစ်အင်အား အဓိက ဖြည့်တင်းနေတဲ့လမ်းကြောင်း ဖြစ်ပါတယ်။
စစ်တပ်ဘက်ကတော့ ကျောက်ဂူနဲ့တောင်းခမ်းရွာက တိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
