ပို့လဘား၊ ဒီဇင်ဘာ ၃ ရက်၊ ကွတ်ခိုင်
ရှမ်းမြောက် ကွတ်ခိုင်မြို့နယ် နမ့်ဖက်ကာကျေးရွာက လင်မယားနှစ်ဦးဟာ လယ်ယာကနေ ပြန်လာနေချိန် ဓားခုတ်ခံရပြီး ဒဏ်ရာအပြင်းအထန်ရရှိခဲ့တယ်လို့ ဖြစ်စဉ်သိရှိသူ အမျိုးသားတစ်ဦးရဲ့ ပြောပြချက်အရ သိရပါတယ်။
မနေ့ ဒီဇင်ဘာ ၂ ရက် နေ့လယ် ၃ နာရီဝန်းကျင်မှာ အဆိုပါ လင်မယားနှစ်ဦးက ၎င်းတို့ရဲ့ လယ်ယာကနေ ပြန်လာချိန်မှာပဲ ဓားနဲ့ ခုတ်ခံခဲ့ရတာ ဖြစ်ပါတယ်။
“သူတို့နှစ်ယောက်က သူတို့လယ်ယာမှာ ထင်းသွားခုတ်တာ။ လယ်ယာကနေ ပြန်လာလို့ အဲဒီအမျိုးသားက သူတို့နောက်ကိုလာပြီး သူ့အမျိုးသားရဲ့ မျက်နှာကို ဓားနဲ့ အရင်ခုတ်သွားတယ်။ ပြီးမှ သူ့အမျိုးသမီးကို ခုတ်သွားတာ။ သူကဘယ်သူဘယ်ဝါလည်း မသိဘူး။ သူ့မျက်နှာကိုလည်း မမှတ်မိဘူး။ KIA တွေက လူနှစ်ယောက်ကို ဖမ်းမိတယ်လို့ ပြောတာပဲ။ သူ ဟုတ်မဟုတ်မသိဘူး။ မျက်နှာမမှတ်မိတော့”
ဓားခုတ်ခံရသူ လင်မယားနှစ်ဦးဟာ အသက် ၄၃ ဝန်းကျင်အရွယ်ရှိတဲ့ ဒေါ်အီမေနဲ့ အသက် ၄၇ နှစ်အရွယ်ရှိတဲ့ ဦးအိုက်လှိုင်တို့ဖြစ်ပြီး နမ့်ဖက်ကာကျေးရွာ အောင်သပြေရပ်ကွက်မှာ နေထိုင်ကြသူတွေလို့လည်း သိရပါတယ်။
လက်ရှိမှာတော့ ဓားခုတ်ခံရတဲ့ အဲဒီလင်မယားနှစ်ဦးဟာ ကွတ်ခိုင်မြို့နယ် ပြည်သူ့ဆေးရုံမှာ ဆေးကုသမှု ခံယူနေတယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
