လွေးပို့လဘား၊ မိုင်းရူပ၊ ဒီဇင်ဘာ ၂ ရက်
ရှမ်းမြောက် လားရှိုးမြို့မှာ စစ်ကောင်စီကျင်းပမယ့် ရွေးကောက်ပွဲအပေါ် လူထုအများစုက စိတ်မဝင်စားတာကြောင့် စစ်ကောင်စီရဲ့ ရဲနဲ့ ထွေအုပ်တို့ ပေါင်းပြီး နေအိမ်အထိ မဲစာရင်းလာပြနေရတယ်လို့ လားရှိုးမြို့ခံတွေက ရွှေဖီမြေကို ပြောပါတယ်။
မနေ့ ဒီဇင်ဘာ ၁ ရက်ကစပြီး စစ်ကောင်စီရဲ့ ရဲ၊ ထွေအုပ်နဲ့ လူဝင်မှုကြီးကြပ်ရေးနဲ့ ပြည်သူ့အင်အားဦးစီးဌာန (လဝက) တို့ ပူးပေါင်းပြီး လားရှိုးမြို့ပေါ်ရှိ ရပ်ကွက်တိုင်းမှာ အိမ်ထောင်စုနဲ့ မဲစာရင်းတိုက်ကာ ရွေးကောက်ပွဲကျင်းပချိန် တခြားဒေသ ရောက်နေသူတွေ ပြန်ရောက်နိုင်ခြင်း ရှိမရှိကိုလည်း မေးမြန်းခဲ့တယ်လို့ ဆိုပါတယ်။
“ကိုယ်အိမ်ထောင်စု မိတ္တူယူပြီး မဲစာရင်းနဲ့ တိုက်။ မဲထည့်ချိန် ပြန်ရောက်နိုင်မရောက်နိုင် မေးပြီးစာရင်းမှတ်တာပဲ တွေ့ပါတယ်။ ဒီနေ့လည်း စစ်နေတုန်းပဲ။ ရပ်ကွက်ရုံးနဲ့ နီးတဲ့အိမ်ကျတော့ ရပ်ကွက်ရုံးမှာ မဲစာရင်းနဲ့ အိမ်ထောင်စုသွားတိုက်ရတယ်” လို့ လားရှိုးမြို့ခံ အမျိုးသာတစ်ဦးက ရွှေဖီမြေကို ပြောပါတယ်။
ဒုတိယအကြိမ် မဲစာရင်းကပ်မယ့်ရက်ကို ပြီးခဲ့တဲ့ နိုဝင်ဘာလ ၂၁ ရက်ကနေ လာမယ့် ဒီဇင်ဘာ ၄ ရက်အထိ စစ်ကောင်စီရဲ့ ရွေးကောက်ပွဲကော်မရှင်က သတ်မှတ်ထားပြီး လားရှိုးမြို့မှာတော့ မဲစာရင်း သွားရောက်ကြည့်သူနည်းတယ်လို့ မြို့ခံတွေက ဆိုပါတယ်။
ဒါ့အပြင် မူဆယ်မြို့က ရပ်ကွက်တချို့မှာလည်း ဒေသခံတွေနဲ့ ရွေ့ပြောင်းအလုပ်သမားတွေရဲ့ လူဦးရေစာရင်း အတိအကျပေးဖို့ စစ်ကောင်စီက ဖိအားပေးတာတွေ လုပ်နေတယ်လို့ ဒေသခံတွေရဲ့ ပြောပြချက်အရ သိရပါတယ်။
နိုဝင်ဘာ ၃၀ ရက်မှာလည်း မူဆယ်မြို့ ဟိုနားရပ်ကွက်နဲ့ တခြားရပ်ကွက်တွေမှာ ရဲတပ်ဖွဲ့တွေက လူဦးရေစာရင်းအတိအကျတွေ ကောက်ယူသွားခဲ့တယ်လို့ ဒေသခံအမျိုးသမီးတစ်ဦးက ပြောပါတယ်။
“သူတို့လာကောက်တဲ့အချိန် ဖုန်းလိုင်းတွေလည်း အကုန်ပိတ်ထားတယ်။ မှတ်ပုံတင်နဲ့ အိမ်ထောင်စုတွေ လာကောက်သွားကြတယ်။ ရပ်ကွက်တိုင်းမှာ ကောက်ကြပြီ။ ကျွန်မတို့နေတဲ့ ရပ်ကွက်မှာတော့ သူတို့မဲမပေးရင် စာအုပ်နီ (BP) လုပ်မပေးတော့ဘူးပြောတယ်။ သူတို့ကောက်သွားတဲ့ စာရင်းတွေလည်း လူအစားထိုးလာထည့်လို့ မရဘူး။ ကိုယ်တိုင်လာထည့် ရမယ်”
မူဆယ်မြို့ ဟိုမွန်ရပ်ကွက်ဘက်မှာလည်း ပြီးခဲ့တဲ့ နိုဝင်ဘာလ နောက်ဆုံးအပတ်တုန်းက စစ်ကောင်စီရဲ့ ရွေးကောက်ပွဲကော်မရှင်၊ နယ်မြေမှူးနဲ့ လဝကအဖွဲ့တို့က ရွေးကောက်ပွဲအတွက် လူဦးရေစာရင်း အတိအကျကို ကောက်ယူသွားတယ်လို့ နောက်ထပ်အမျိုးသားတစ်ဦးက ပြောပါတယ်။
“မဲစာရင်းထည့်မဲ့သူတွေ အတည်ပြုဖို့ စာရင်းလာကောက်ကြတယ်။ အိမ်မှာ လူဘယ်နှစ်ယောက်ရှိလဲဆိုပြီး မေးသွားတယ်။ အိမ်မှာ လူ ၄ယောက်ရှိရင်လည်း အကုန်ထည့်ရမယ်။ အိမ်ထဲမှာ ခရီးထွက်တဲ့သူရှိရင်လည်း အဲနေ့ကျရင် ဖြစ်နိုင်ရင် လာထည့်ခိုင်းဖို့ ပြောတယ်။ ပြီးခဲ့တဲ့လက မဲပေးစနစ်ကိုလည်း သူတို့ခေါ်ပြသေးတယ်။ ခလုတ်ဘယ်လိုနှိပ်ရမလဲဆိုပြီး နမူနာခေါ်ပြတယ် ရပ်ကွက်အလိုက်ခေါ်တာပဲ”
ရွေးကောက်ပွဲမှာ မဲပေးနိုင်တဲ့ မဲဆန္ဒရှင်စာရင်းတွေကို မူဆယ်မြို့ရှိ ဓမ္မာရုံနဲ့ ရပ်ကွက်ရုံးတွေမှာ ကပ်ထားတယ်လို့ ဆိုပါတယ်။
မူဆယ်နဲ့ လားရှိုးမြို့တွေမှာ ဝင်ရောက်ယှဉ်ပြိုင်မယ့် ပါတီတွေကတော့ စစ်ကောင်စီရဲ့ ကြံ့ခိုင်ရေးနဲ ဖွံဖြိုးရေးပါတီ USDP၊ ပြည်သူ့ရှေ့ဆောင်ပါတီ PPP၊ ကျားဖြူပါတီ SNDP တို့ ရွေးကောက်ပွဲဝင်ရောက်ယှဥ်ပြိုင်မှာ ဖြစ်ပါတယ်။
လားရှိုးမြို့ထဲမှာတော့ ရွေးကောက်ပွဲ အောင်နိုင်ရေးဆိုင်းဘုတ်တွေ တင်ထားတာတွေ့ရပေမယ့် မဲဆွယ်စည်းရုံးရေးလုပ်ဆောင်တာ မတွေ့ရသေးဘူးလို့ မြို့ခံတွေက ပြောပါတယ်။
လားရှိုးမြို့အပါအဝင် ရှမ်းမြောက် နောင်ချိုနဲ့ မူဆယ်မြို့တွေကို ရွေးကောက်ပွဲ ပထမအပိုင်းကျင်းပမယ့် နယ်မြေထဲ စစ်ကောင်စီရဲ့ရွေးကောက်ပွဲကော်မရှင်က ထည့်သွင်းထားပါတယ်။
ရွေးကောက်ပွဲပထမအပိုင်းကို လာမယ့် ဒီဇင်ဘာ ၂၈ရက်မှာ စစ်ကောင်စီက စတင်ကျင်းပမှာဖြစ်ပြီး ရွေးကောက်ပွဲကို အပိုင်း ၃ ပိုင်းနဲ့ ကျင်းပသွားမယ်လို့ စစ်ကောင်စီရဲ့ ရွေးကောက်ပွဲကော်မရှင်က ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
