လွေးလာဝ်ဇာရ်၊ ဒီဆဲမ်ဘာ ဆငည်း 2၊ မိူင်ယယ်
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဖုင်ဆျှိုည်ဖီမျေဒါႈ ဒီဘိူန်း တံပ်ကညာဏာဆီုက်ဇေဝ်ကဲတ ထိင်ခြဲ ပဂေတ်ဒီလီပ်လေႈခေဲင်ကီုင်းမိူင်ယယ်နီန်အူဒီ ဂေါႇမိုႈတံပ်ကညာအာဏာဆီုက်ဇေဝ်ကဲ အာဝ်ဒဲႈကဲခ္လေါႈနီန် ကား 50 ကြောင်အာဝ်ဘိူန်းစိ ခ္လေါႈဟာဝ်းႎီရ်အောႏ။
ကဲဒါႈ ဇူႈဒါကျံရ်နိုႎဲမ်ဘာ ဆငည်း 17 ဒိူန်ရောတ်အဒိူဝ် ကျံရ်ဒီဆဲမ်ဘာ ဆငည်း 2 နီန် ဂေါႇမိုႈကဲညှံမ်ဒဲႈအယ်ခ္လေါႈနီန် ကညာကားကဲ ကတူႈခည်း ဘည်ကီန်ဒည်းနီန်အောႏ။
ကညာကားအီအာဝ်ဘိူန်းခ္လေါႈနီန်အူအီးက္လာင်းဒါႈ “ ကညာကား အီတာင်လှဲက်ကာည်း မနားကဲဒိူန် မိုႈဘိုး ကားအီတာင်ဂြိုကဲဟံရ်မာ်ဂီုန်း။ ကဲညှံမ်ႎှိုဝ်ႈဒဲႈဒေင်နီန်ဒီႈ စီပဲန်ကတူႈကီန်း။ လောင်နံင်ဘိကဲတဒေင်မာ် ကဲအာဝ်က္လာင်းစိ ကဲဘိလိူည်ဘည်ဒီန် ပေန်ကတူႈခည်း ကီန်းနီန်။ ကဲဒါႈအေ့နံင်ႎှိုဝ်ႈဒဲႈ မိုႈလိူည်ကံပ်ရောတ်ကဇေန်းနီ ကဲညှံမ်ဒဲႈစိ။ ခေဲင်အရာင်းပ်ုန်မိူဝ်ႈမာ်ကဲနီန်မာ် ဟည်တောပ်ဟာဝ်းဒိုႇ”
အ်ုန်ဆီုပ်ဒါႈဘိုး ကားကဲအီအာဝ်တာင်ဂြို ပ်ုန်ဒါႈကဲအာဝ်ဘိူန်းတာင်နီန် ကဲလိုအေ့ဒဲႈအီခ္လေါႈဟာဝ်း။
“ခည်နှားအာည်ႇဒိူန် ကဲဆီုင်ဂီုည်လေႈကဲပ်ရိူန်း ရူရ်ႈအီလီပ်တြားဒိူန်။ ဘည်ဆိင်ဒဲႈတ ကဲရေဲန်မိုႈ ဆိင်ဒဲႈဖါ်ႈကဲစေတ်မေန်းဂြိုပ်ုန်တာင်အီနီန် အ်ုန်တောပ်အာဝ်တောပ်ဂြို ပ်ုန်ဒါႈကဲအာဝ်ဘိူန်းတာင်နီန် ဆာ်တောပ်မာ် ဆိင်ဒဲႈပွံတ်ကဲဘိ။ ကားကဲအီအာဝ်တောပ်ကဲဒိူန်စိ ဒဲႈပွံတ်ကဲခ္လေါႈဟာဝ်း။ ကားကဲအီတာင်ဂြိုအီတောပ်တြားကဲဒိူန်မာ် ကဲဘိဖါ်ႈစီအာဝ်ဒဲႈအီခ္လေါႈနီန် အာဝ်ဆံင်တော်ဒီႈကော်”။
ခည်ကျံရ်နိုႎဲမ်ဘာ ခေဲင်နှားအူဒိူန်မာ် တံပ်ကညာအာဏာဆီုက်ဇေဝ်ကဲ ဟာဝ်းဘိကားအီတာင်ဂြို ကဲအီဒေဲႈ ကဒါႇကုင်ခယ်နီန် အာဝ်ဒဲႈစိကဲခ္လေါႈအောႏ။
ပဂေတ်ဒီလီပ်လေႈခေဲင်ကီုင်းမိူင်ယယ်ဒီန် ခည်ကျံရ်အောဂ်ုတ်ဒိူန်မာ် တံပ်ကညာအာဏာဆီုက်ဇေဝ်ကဲ မှာန်းဟာဝ်းရိူန်းတ ကညာကားကဲဒါႈ ကနာည် လံပ်ကတ်ုမ်ဂေတ်နီန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
