ယာရူစိင်၊ ဒီဇင်ဘာ ၁ ရက်၊ သီပေါ
စစ်ကောင်စီတပ်နဲ့ ကိုးကန့်တပ်တို့ အပြန်အလှန်ပိတ်ဆို့ထားတဲ့ ပြည်ထောင်စုလမ်းမကြီးပေါ်ရှိ သီပေါတံတားကို လက်ရှိအချိန်ထိ ပိတ်ထားနေဆဲဖြစ်ကြောင်း သီပေါမြို့ခံတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ နိုဝင်ဘာ ၁၄ ရက် မနက် ၆ နာရီမှာ သီပေါအဝင်အထွက်တံတားကို နှစ်ဖက်တပ်က အပြန်အလှန် ပိတ်ထားခဲ့ရာ ဒီနေ့ ဒီဇင်ဘာ ၁ ရက်အထိလည်း ပြန်ဖွင့်ပေးတာ မရှိသေးဘူးလို့ ဆိုပါတယ်။
“တချို့ကျ ပြန်ဖွင့်တယ်ဆိုပြီး ဆိုရှယ်မီဒီယာမှာ တင်နေကြတာ။ တကယ်တော့ ပိတ်ထားတုန်းပဲ။ မဖွင့်သေးပါဘူး။ ဒီတိုင်း လမ်းလျှောက်ပြီး ဖြတ်သွားလို့ပဲ ရတာပါ” လို့ သီပေါမြို့ခံတစ်ဦးက ပြောပါတယ်။
သီပေါတံတား ပိတ်ထားတာကြောင့် ဒေသခံတွေက တာလုံရွာက ချောင်းကိုပဲ အသုံးပြုကြရပြီး ဆိုင်ကယ်၊ ကားတွေကိုတော့ အမျိုးအစားပေါ် မူတည်ပြီး ရှမ်းတပ် SSPP က ငွေကြေးကောက်ခံကာ ကမ်းကူးပေးတာဖြစ်ပါတယ်။
ယာဉ်မောင်းတစ်ဦးက”ကျနော်တို့တုန်းကဆို ၂ ပတ်လောက် ကြာတယ်။ ဖြတ်သွားလို့ မရသေးဘူး။ ကားတွေလည်း အရမ်းများတာလေ။ စက်ကူးနေရတာဆိုတော့လည်း စောင့်ကြတာပဲလေ။ စက်ကူးခကျ ကားတစ်စီးနဲ့တစ်စီး မတူဘူး” လို့ ပြောပါတယ်။
နောင်ချို- ကျောက်ဂူလမ်းကိုလည်း စစ်ကောင်စီတပ်က ပြီးခဲ့တဲ့ နိုဝင်ဘာ ၁၈ ရက်မှာ ဖြတ်သန်းသွားလာခွင့် ပိတ်ထားခဲ့ရာ ပြီးခဲ့တဲ့ နိုဝင်ဘာ ၂၃ ရက်မှာတော့ ပြန်လည်ဖွင့်လှစ်ပေးခဲ့ပါတယ်။
လက်ရှိမှာ သီပေါမြို့နယ် နမ့်လန်မြို့နဲ့ ရပ်စောက်မြို့နယ် ကျောက်ဂူလမ်း အဝင်အထွက်ကို စစ်ကောင်စီတပ်က ဖြတ်သန်းသွားလာခွင့်ကို ပိတ်ထားဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
