မိုင်းရူပ၊ ဒီဇင်ဘာ ၁ ရက်
စစ်ကောင်စီတပ်ထံ မြို့လွှဲပြောင်းပြီးနောက် မန္တလေးတိုင်း မိုးကုတ်မြို့နဲ့ ရှမ်းမြောက် မိုးမိတ်မြို့ပေါ်ကနေ တအာင်းတပ်မတော် TNLA ရဲ့ တပ်ဖွဲ့ဝင်တွေက မြို့ထဲကနေ ဆုတ်ခွာသွားပြီလို့ မြေပြင်အခြေနေ သိရှိသူတွေက ရွှေဖီမြေကို ပြောပါတယ်။
မနေ့ နိုဝင်ဘာ ၃၀ ရက်မှာ မိုးကုတ်နဲ့ မိုးမိတ်မြို့ကို စစ်ကောင်စီထံ တအာင်းတပ်က လွှဲပြောင်းပေးခဲ့ပြီး မြို့တွင်းကနေ ဆုတ်ခွာခဲ့တာ ဖြစ်ပါတယ်။
ဒီနေ့ ဒီဇင်ဘာ ၁ ရက်မှာ မိုးကုတ် – မိုးမိတ်လမ်းပိုင်းမှာလည်း တအာင်းတပ်ဖွဲ့ဝင်တွေကို မတွေ့ရတော့ဘူးလို့ မိုးကုတ်ဒေသခံတစ်ဦးက ရွှေဖီမြေကို ပြောပါတယ်။
“ပိန်းပြစ်မှာရှိတဲ့ TNLA အဖွဲ့တွေကျတော့ မိုင်းလုံဘက် ပြန်သွားတယ်။ ရွှေသာယာမှာ ရှိတဲ့အဖွဲ့ကျတော့ မန်တုံဘက် ပြန်သွားတယ်။ အခု မိုးကုတ် – မိုးမိတ်လမ်းမှာ TNLA တွေ မရှိတော့ဘူး” လို့ ဆိုပါတယ်။
နောက်ထပ် မြေပြင်အခြေအနေ သိရှိသူတစ်ဦးကလည်း “TNLA ဘက်က အကုန်ဆုတ်ပြီလို့ ပြောလို့ရတယ်။ မိုးမိတ်မြို့ထဲကိုဆိုရင် ဆက်ဆံရေးရုံးပုံစံမျိုး ထားတဲ့အနေနဲ့ မြို့ထဲမှာ ၁၀ ယောက်ဝန်းကျင်လောက်ဘဲ ကျန်မယ်” လို့ ပြောပါတယ်။
မနေ့ နိုဝင်ဘာ ၃၀ ရက်မှာ မိုးကုတ်ကနေ မိုးမိတ်မြို့ဘက်ကို စစ်ကောင်စီရဲ့ ယာဥ်တန်း ၂၀ ကျော် ဝင်ရောက်လာပြီး မိုးမိတ်မြို့အပြင်ဘက်မှာ စစ်ကောင်စီတပ်နဲ့ ကချင်တပ် KIA၊ တော်လှန်ရေး ပူးပေါင်းတပ်တွေအကြား ထိတွေ့တိုက်ပွဲဖြစ်ပွားခဲ့တယ်လို့ သိရပါတယ်။
ဒါ့အပြင် မနေ့ညနေ ၅ နာရီခွဲဝန်းကျင်မှာပဲ မိုးကုတ်မြို့ အနောက်ပိုင်းအနီးမှာရှိတဲ့ ဘော်မကျေးရွာဘက်ကို စစ်ကောင်စီက ထိုးလာတာကြောင့် တော်လှန်ရေးတပ်တွေနဲ့ မိနစ်ပိုင်း တိုက်ပွဲဖြစ်ပွားခဲ့တယ်လို့ မိုးကုတ်အခြေစိုက် တော်လှန်ရေးတပ်ဖွဲ့ဝင်တစ်ဦးက ပြောပါတယ်။
“မိုးကုတ်အနောက်ပိုင်း ဘော်မရွာဘက် စကစက တက်လာတာပေါ့။ ဒီဘက်က ပြန်ပစ်တော့ သူတို့ ပြန်ဆုတ်သွားတာ” လို့ ဆိုပါတယ်။
ဒီနေ့ ဒီဇင်ဘာ ၁ ရက်မှာတော့ မိုးကုတ်မြို့ဘောလုံးကွင်းမှာ စစ်ကောင်စီက လက်နက်ကြီးတပ်ဆင်ထားပြီး မနက်ပိုင်းမှာ လက်နက်ကြီးသံတွေလည်း ဆက်တိုက်ကြားနေရတယ်လို့ မိုးကုတ်ဒေသခံတချို့က ပြောပါတယ်။
မိုးကုတ်မြို့ခံအားလုံးနီးပါကတော့ ဘေးလွှတ်ရာကို ထွက်ပြေးတိမ်းရှောင်နေကြပြီး TNLA ဘက်က မိုးကုတ်နဲ့ မိုးမိတ်မြို့ကနေ ဆုတ်ခွာရင် စစ်ကောင်စီတပ်နဲ့ တော်လှန်ရေးတပ်တွေအကြား တိုက်ပွဲဖြစ်လာနိုင်တယ်လို့ သုံးသပ်မှုတွေ ရှိနေပါတယ်။
တရုတ်နိုင်ငံရဲ့ ကြားဝင်မှုနဲ့ စစ်ကောင်စီတပ်နဲ့ TNLA တပ်တို့ ပြီးခဲ့တဲ့ အောက်တိုဘာ ၂၉ ရက်ကစပြီး အပစ်ရပ်ဖို့ သဘောတူခဲ့သလို တအာင်းတပ်ဖက်က မိုးကုတ်နဲ့ မိုးမိတ်မြို့နယ်ကို စစ်ကောင်စီထံ ပြန်လည်လွှဲပြောင်းပေးဖို့လည်း သဘောတူခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
