မိုင်းရူပ၊ နိုဝင်ဘာ ၂၇ ရက်၊ မိုးကုတ်
တရုတ်နိုင်ငံရဲ့ ကြားဝင်မှုနဲ့ စစ်ကောင်စီကို ပြန်လွှဲပေးရမယ့် မန္တလေးတိုင်း မိုးကုတ်မြို့တွင်းကနေ ပြည်သူ့ကာကွယ်ရေးတပ် PDF တွေ ဆုတ်ခွာသွားပြီလို့ မြေပြင်သတင်းအရင်းအမြစ်တွေက ရွှေဖီမြေကို ပြောပါတယ်။
“မြို့တွင်းထဲမှာ PDF တပ်တွေ မရှိတော့ဘူး။ အကုန်ဆုတ်ခွာသွားပြီ” လို့ မိုးကုတ်မြို့တွင်းမှာ ရှိနေသူတစ်ဦးက ရွှေဖီမြေသို့ ပြောပါတယ်။
လက်ရှိ မိုးကုတ်မြို့ထဲမှာ မြို့ခံတွေအများစုက ထွက်ပြေးတိမ်းရှောင်နေကြပြီး မြို့တွင်းရှိ ဆိုင်အများစုလည်း ပိတ်ထားတယ်လို့ မိုးကုတ်ဒေသခံတစ်ဦးက ဆိုပါတယ်။
“မြို့တွင်းမှာ လူတော်တော်နည်းလာပြီ။ ဆိုင်တွေလည်း ပိတ်ထားတယ်။ စကစဝင်လာတာတော့ မတွေ့သေးဘူး” ၎င်းက ဆိုပါတယ်။
မိုးကုတ်မြို့ထဲမှာ မန္တလေး PDF အပါအဝင် မိုးကုတ်ဗျူဟာနဲ့ မိုးကုတ်ပကဖ စတဲ့ တော်လှန်ရေးတပ်တွေ သွားလာလှုပ်ရှားကြတာ ဖြစ်ပါတယ်။
လာမယ့်ရက်ပိုင်းအတွင်း မြို့လွှဲပြောင်းရေးအတွက် စစ်ကောင်စီတပ်နဲ့ တအာင်းတပ် PSLF/TNLA အကြား ထပ်မံတွေ့ဆုံဖို့ ရှိတယ်လို့ ရွှေဖီမြေက စုံစမ်းသိရှိရပါတယ်။
စစ်ကောင်စီတပ်ဟာ နောင်ချို – မိုးကုတ်လမ်းပိုင်းကနေ ဝင်လာမယ်လို့ သတင်းတွေ ထွက်ပေါ်နေပြီး TNLA ဘက်ကလည်း မိုးမိတ်နဲ့ မိုးကုတ်မှာ စစ်အင်အားရာနဲ့ချီ အသုံးပြုပြီး ဖြန့်ကျက်နေရာယူထားတယ်လို့ မြေပြင်သတင်းအရင်းမြစ်တွေက ပြောပါတယ်။
ပြီးခဲ့တဲ့ အောက်တိုဘာ ၂၉ ရက်ကစပြီး တရုတ်နိုင်ငံရဲ့ ကြားဝင်မှုနဲ့ စစ်ကောင်စီတပ်နဲ့ TNLA တို့ အပစ်ရပ်ဖို့ သဘောတူခဲ့ပြီး တအာင်းတပ်က မိုးကုတ်နဲ့ မိုးမိတ်မြို့နယ်ကို စစ်ကောင်စီထံ ပြန်လည်လွှဲပြောင်းပေးဖို့ သဘောတူညီခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
