အိုက်ပွီး၊ နိုဝင်ဘာ ၂၅ ရက်၊ ကလေး
စစ်ကိုင်းတိုင်း ကလေးမြို့နယ် ရာဇဂြိုလ်၊ ခုံသာ၊ ထိုမာ၊ ထောက်ကြန့် စတဲ့ကျေးရွာတွေက ဒေသခံတွေရဲ့ လယ်ထဲက စပါးတွေကို စစ်ကောင်စီတပ်တွေက ခိုးယူရိတ်သိမ်းနေတယ်လို့ မျက်မြင်ဒေသခံ အမျိုးသမီးတစ်ဦးက ရွှေဖီမြေသို့ ပြောပါတယ်။
ကလေးမြို့နယ်သို့ စစ်ကြောင်းထိုးလာတဲ့ စစ်ကောင်စီတပ်နဲ့ တော်လှန်ရေးတပ်ဖွဲ့တို့ တိုက်ပွဲဖြစ်ပွားနေတာကြောင့် ထွက်ပြေးတိမ်းရှောင်နေကြတဲ့ ဒေသခံတွေရဲ့ လယ်ထဲက စပါးတွေကို ပြီးခဲ့တဲ့ နိုဝင်ဘာလ ပထမအပတ်ကတည်းက ခိုးယူရိတ်သိမ်းနေတာ ဖြစ်ပါတယ်။
“စပါးခိုးယူရိတ်သိမ်းခံရတဲ့ ရွာတွေက ကလေးမြို့အနီးအနားဝန်းကျင်တွေက စပါးခင်းတွေ ဖြစ်ပါတယ်။ အဲရွာက လူတွေက စစ်ဘေးရှောင်ကြတယ်။ လူတွေ မရှိဘူး။ စပါးက မှည့်နေကြပြီ။ မှည့်တဲ့စပါးခင်းတွေက စပါးတွေကို စစ်တပ်က ရိတ်တာပါ။ ထိုမာနဲ့ ရာဇာဂြိုလ် ရွာလေးတင် ဧက တစ်ထောင်ကျော် ရိတ်ခံရတယ်” လို့ မျက်မြင်ဒေသခံ အမျိုးသမီးတစ်ဦးက ရွှေဖီမြေသို့ ပြောပါတယ်။
စစ်ကောင်စီတပ်ဖွဲ့ဝင်တွေက စပါးခိုးယူရိတ်သိမ်းရာမှာ စက်ကို အသုံးပြုပြီး ချွေထားတဲ့စပါးတွေကို ကလေးမြို့က စစ်ကောင်စီရဲ့ ဒစကထဲကို ကားတွေနဲ့ ပို့ဆောင်ထားတယ်လို့ သိရပါတယ်။
“စစ်သားတွေက စပါးကို နေ့ခင်းကြောင်တောင် ပေါ်တင်ကြီး စက်နဲ့ ရိတ်ကြတယ်။ ပြီးတော့ စပါးတွေကိုလည်း ဒစကထဲကို တစ်နေကုန်နီးပါး ကား ၄ စီး၊ ၅ စီးလောက်နဲ့ သယ်တယ်။ လယ်တော်တော်များ ရိတ်သိမ်းခံရပါတယ်” လို့ အထက်ပါ မျက်မြင်သက်သေ အမျိုးသမီးတစ်ဦးက ရွှေဖီမြေသို့ ပြောပါတယ်။
ကလေးမြို့နယ်မြောက်ပိုင်း၊ တောင်ပိုင်းရှိ ဒေသခံတွေဟာ လယ်စပါးတွေကို အဓိက စိုက်ပျိုးကြပြီး လက်ရှိမှာ စပါးတွေက မှည့်နေပြီဖြစ်ပေမယ့် တိုက်ပွဲကြောင့် နေရပ်မပြန်နိုင်သေးသလို စပါးတွေလည်း မရိတ်နိုင်သေးဘူးလို့ သိရပါတယ်။
ပြီးခဲ့တဲ့ အောက်တိုဘာလ ၂၇ ရက်နေ့ကစပြီး ကလေးမြို့မှ ထောင်နဲ့ချီတဲ့ စစ်ကောင်စီတပ်ဖွဲ့က ကလေးမြို့နယ်ကို စစ်ကြောင်းထိုးပြီး ရွာပေါင်း ၃၀ ကျော်နဲ့ ဒေသခံ သောင်းနဲ့ချီဟာ ဘေးလွတ်ရာကို ထွက်ပြေးတိမ်းရှောင်နေကြရပါတယ်။
အဲဒီ စစ်ကောင်စီစစ်ကြောင်းနဲ့ တော်လှန်ရေးတပ်ဖွဲ့တွေဟာ ဒီကနေ့ထိ ကလေးမြို့နယ်မှာ ထိတွေ့တိုက်ပွဲတွေ ဖြစ်နေဆဲဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
