မာည်းရူပ၊ ကျံရ်နိုဗဲမ်ဘာ ဆငည်း 24၊ အိုမ်ယ်ုရ်
ဒီဘိူန်းတံပ်ဆီုက်တအာင်း PSLF/TNLA ကဲတထိင်ခြဲ ပလှံင်အိုမ်ယ်ုရ်နီန် ကဝ်အီဘိူန်းအဆာက် 14 ဆန်ုမ် ကောန်အီပ်ုန်ကောန်ကျောင် 7 တာန်း နီန်အူအီး ကတူႈအီလီလာနဘာည်းဟာဝ်း။
ကောန်အီပ်ုန် ကဝ်အီကဒံပ်တောပ် ကောန်အီပ်ုန်အ်ုန်အီကတူႈ အီလီလာနဘာည်းဒီန် က္လာင်းတဖုင်ဆျှိုည်ဖီမျေဒါႈ ခည်ကျံရ်နိုဗဲမ်ဘာ ဆငည်း 17 ဇူန်အံပ်ဒိူန် ခေဲင်ခမိုလုံတောက် ပရဝ်အူရဝ်နီန် ကောန်အီမာည်းအူအီ အ်ုန်အီဂေါည်ခေဲင်ရဝ်ဒီန် မာဝ်းဖါ်ႈအိုမ်ဘာႈ စီလီလာနဘာည်းဟာဝ်းတ ကောန်ကျောင် 7 တာန် ကောန်အီပ်ုန်အူအီးဒီန်အောႏ။
ကဲဒါႈ “ မာကောန်အီပ်ုန်ဒဲႇဒီန် အ်ုန်အီတ်ပမာရ်။ မိုႈလိူည်အ်ုန်အီဂေါည်ပဂါင်။ ခီမှိူဝ်ဒီန် ကောန်အီမာည်း ရီန်ဖါ်ႈဒေႎှိုဝ်ႈပ္လိုႈဒီန်စီ လီပ်ဟာဝ်းခေဲင်ဂါင်ကဲ။ ခိင်ရီန်းကောန်အီပ်ုန်ဒီရံင် ကောန်အီမာည်းဒီန် ဘိဖါ်ႈမိုည်ႇအ်ုန်စီ ဒါဟူပ်ဘက်ဘိုးမိုည်ႇကောန်အီပ်ုန်ဒီန်။ အ်ုန်လီလာနဘာည်းဟောည်ႇဖါ်ႈ ဘံန်ရောတ် ခီညှာကပံတ် 3 နြီ ကောန်အီမာည်းဒီန်စီ ယိူဝ်ႇလေႈဟာဝ်းလာ်ဒါႇဂါင်ဒီန်”
အ်ုန်ဆီုပ်က္လာင်းဒါႈဘိုး ကောန်အီမာည်းဒီန် ကပျောဟာဝ်းဘိုး ကောန်အီပ်ုန်ဒီန်ဒါႈ ဆာ်မာည်းက္လာင်း ပ်ုန်လီလာနဘာည်းဟာဝ်းနီန်တအီး နံင်ပျံမ်းဟာဝ်းမည်း။
ဖုင်ပလိက်တံပ်ဆီုက်တအာင်း PSLF/TNLA ကဲ ဟည်တိုည်းဟာဝ်း ကောန်အီမာည်း ကဝ်အီလီလာနဘာည်းဟာဝ်း အ်ုန်အီဇီုဝ်မာည်းစော်ထေး ဘိူန်းအဆာက် 24 ဒီန် ခည်ကျံရ်နိုဗဲမ်ဘာ ဆငည်း 18 ဒိူန်အောႏ။
တံပ်ဆီုက်တအာင်းကဲ ပ္လိူရ်ႈလေႈအဒိူဝ် ကျံရ်နိုဗဲမ်ဘာ ဆငည်း 24 နီန်ဒါႈ ကဒါႇကဲမာ်ဟည်ဘိူန်းတိုည်းအူန်း ကောန်အီမာည်းဒီန် ကနာည်နံင်ဘယ််တိူဝ်ႈဟာဝ်းအရေးတအ်ုန်အောႏ။
ခည်ကျံရ်နိုဗဲမ်ဘာ ဆငည်း 6 ဒိူန်မာ် ဒီဘိူန်းတံပ်ဆီုက်တအာင်း PSLF/TNLA ကဲတထိင်ခြဲ ခေဲင်ကီုင်းအေဲမ်ကိုက်နီန် ကညာဆဴင်ဂ်ုပ်ကိင်အူအီး ရီန်းဒေလီနဘာည်းဟာဝ်း တကောန်အီပ်ုန်အီရေဲန်ဇီုင်းကာန်ခေဲင်ဆဴင်ဒီန်အူအီးအောႏ။
ဆဲႈဒီန် ခည်ကျံရ်ဆဲပ်တဲမ်ဘာဒိူန်မာ် ပဂါင်ဆန်ုမ်အ်ုန်အီဂေါည်ခေဲင်ကီုင်းအေဲမ်ကိုက်နီန်အူလှေ ကညာဆဴင်ဒီန် လီလာနဘာည်းဟာဝ်းတ ကောန်အီပ်ုန်ဒဲႇ အ်ုန်အီဘိူန်းအဆာက် 15 ဆန်ုမ်နီန် ဂည်လိူဝ်ႈဂည်လိူဝ်ႈအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
