ပျားကြီး၊ ဇန်နဝါရီ ၁၅ ရက်၊ ဖားကန့်
ကချင်ပြည်နယ် ဖားကန့်မြို့နယ် ဆိပ်မူကျေးရွာအုပ်စု စပေါ့ရွာအနီးက ရတနာအဓိပတိ ကျောက်လုပ်ကွက် မြေစာပုံနွံကန် ပွင့်ထွက်မှုကြောင့် သေဆုံးသူ ၃၁ ဦးအထိ ရှိလာနေတယ်လို့ ဒေသခံတွေက ပြောပါတယ်။
ဇန်နဝါရီ ၁၃ ရက် မနက်အစောပိုင်းက မြေစာစွန့်ပစ်ချိန်မှာ နွံတွေ လျှံထွက်ပြီး အနီးအနားမှာရှိတဲ့ နေအိမ်တွေကို ဖုံးလွှမ်းခဲ့တာကြောင့် ကလေးသူငယ်အပါအဝင် အခုလို လူသေဆုံးမှု ရှိလာတာပဲ ဖြစ်ပါတယ်။
“ဘက်ဟိုးတွေနဲ့ ခက်ခက်ခဲခဲ ဆွဲထုတ်ရတာ။ တချို့ဆို ၄ နာရီလောက်ကြာအောင် ဆွဲထုတ်ရတယ်။ နွံတွေက အပေါ်က အများကြီး ပိကုန်တာလေ” လို့ ဒေသခံ ပရဟိတသမားတစ်ဦးက ပြောပါတယ်။
နွံကန်ပြိုကျမှုဖြစ်စဉ်ကြောင့် အသက်ဆုံးရှုံးခဲ့ရသူတွေထဲ ကလေးသူငယ်နဲ့ အမျိုးသမီး အများဆုံး ပါဝင်ပြီး သေဆုံးသူ စုစုပေါင်းရဲ့ ၇၅ ရာခိုင်နှုန်းအထိ ရှိတယ်လို့ ပရဟိတသမားတွေက ပြောပါတယ်။
နွံကန် ပွင့်ထွက်မှုမှာ အလောင်း မတွေ့ရှိဘဲ ပျောက်ဆုံးနေသူ အနည်းငယ် ကျန်ရှိနေသေးပေမဲ့ ဒီနေ့ညနေပိုင်းမှာတော့ ရှာဖွေမှုကို ရပ်ဆိုင်းလိုက်တယ်လို့ ဒေသခံတွေက ပြောဆိုပါတယ်။
