မိုင်းရူပ၊ နိုဝင်ဘာ ၂၄ ရက်၊ နမ့်ဆန်
တအာင်းတပ်မတော် PSLF/TNLA ထိန်းချုပ်ထားတဲ့ နမ့်ဆန်မြို့နယ်မှာ အသက် ၁၄ နှစ်အရွယ် ၇ တန်းကျောင်းသူ အမျိုးသမီးတစ်ဦး အဓမ္မပြုကျင့်ခံရတဲ့ဖြစ်စဉ် ဖြစ်ပွားခဲ့တယ်လို့ သိရပါတယ်။
ပြီးခဲ့တဲ့ နိုဝင်ဘာ ၁၇ ရက်ညပိုင်းမှာ လုံတောက်ကျေးရွာအုပ်စုထဲက ကျေးရွာတစ်ရွာမှာ တစ်ရွာထဲနေ အမျိုးသားတစ်ဦးက အရက်မူးပြီး ၇ တန်းကျောင်းသူ အမျိုးသမီးတစ်ဦးကို အဓမ္မပြုကျင့်ခဲ့တယ်လို့ ကျူးလွန်ခံရသူ အမျိုးသမီးနဲ့ နီးစပ်သူတစ်ဦးက ရွှေဖီမြေကို ပြောပါတယ်။
“အဲကလေးရဲ့ အမေက တောင်ယာမှာ အိပ်တာ။ အိမ်မှာ သူဘဲကျန်ခဲ့တာ။ ညမှာ အဲအမျိုးသားက တံခါးမရရအောင်ဖွင့်ပြီးမှ အိမ်ထဲကို ဝင်လာတာ။ ကလေးမက အော်ဖို့လုပ်တဲ့အချိန်မှာ ပါးစပ်ပိတ်ထားတယ်။ ပါးစပ်ကို စောင်နဲ့စည်းထားတယ်။ အဲ ကလေးမကို အဓမ္မပြုကျင့်ပြီး နောက်နေ့မနက် ၃ နာရီ လောက်မှာ အဲအိမ်ကနေ ထွက်သွားတယ်” လို့ ဆိုပါတယ်။
၎င်း အဓမ္မပြုကျင့်တာကို တခြားသူထံ ပြောပြရင် သတ်ပစ်မယ်လို့ အဲအမျိုးသားက ခြိမ်းခြောက်ကြောင်းလည်း ၎င်းက ဆက်ပြောပါတယ်။
ကျူးလွန်သူအမျိုးသားဟာ အသက် ၂၄ နှစ်အရွယ်ရှိတဲ့ မိုင်းကျော်ဌေးဆိုသူကို PSLF/TNLA ရဲ့ ရဲတပ်ဖွဲ့က ပြီးခဲ့တဲ့ နိုဝင်ဘာ ၁၈ ရက်မှာ ဖမ်းဆီးထားတယ်လို့ သိရပါတယ်။
တအာင်းတပ်ဘက်ကတော့ ကျူးလွန်သူအမျိုးသားကို ဖမ်းဆီးထားပြီး အရေးယူနိုင်ဖို့ ဆောင်ရွက်နေတယ်လို့ ဒီနေ့ နိုဝင်ဘာလ ၂၄ ရက်မှာ ထုတ်ပြန်ပါတယ်။
ပြီးခဲ့တဲ့ နိုဝင်ဘာ ၆ ရက်မှာလည်း PSLF/TNLA ထိန်းချုပ်ထားတဲ့ ကွတ်ခိုင်မြို့က ဆံပင်ညှပ်ဆိုင်တစ်ဆိုင်မှာ ဆိုင်ရှင်ဖြစ်သူက ဝန်ထမ်းအမျိုးသမီးကို အဓမ္မပြုကျင့်ဖို့ ကြံစည်ခဲ့တဲ့ ဖြစ်စဥ်ဖြစ်ပွားခဲ့ပါတယ်။
ဒါ့အပြင် စက်တင်ဘာလထဲမှာလည်း ကွတ်ခိုင်မြို့ပေါ်ရှိ ဆေးခန်းတစ်ခုမှာ ဆေးခန်းပိုင်ရှင်က အသက်မပြည့်သေးတဲ့ အသက် ၁၅ နှစ်အရွယ် အမျိုးသမီးတစ်ဦးကို အကြိမ်ကြိမ် အဓမ္မပြုကျင့်ခဲ့တဲ့ ဖြစ်စဥ်ဖြစ်ပွားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
