လွေးထွေး၊ ဇန်နဝါရီ ၁၅ ရက်၊ မုံရွာ
စစ်ကိုင်းတိုင်း မုံရွာအခြေစိုက် အနောက်မြောက်တိုင်း စစ်ဌာနချုပ် (နမခ)ကို ရှော့တိုက်ဒုံး ၄ လုံးနဲ့ ပစ်ခံခဲ့ရလို့ ဗိုလ်ကြီးအပါအဝင် ၆ ဦး ပွဲချင်းပြီး သေဆုံးခဲ့သလို တပ်ကြပ်ကြီးအပါအဝင် ၃ ဦးလည်း ဒဏ်ရာ ရခဲ့တယ်လို့ Brave Warriors for Myanmar- BWM က ပြောပါတယ်။
မနေ့ ဇန်နဝါရီ ၁၄ ရက် ည ၁၀ နာရီခန့်မှာ ၁၀၇ မမနဲ့ ရှော့တိုက်ဒုံး ၄ လုံး ပစ်ခတ်တိုက်ခိုက်ခဲ့လို့ နမခ ဒုတိုင်းမှူးရဲ့အဆောင်အပါအဝင် တခြားအဆောက်အဦးလည်း ပြိုကျပျက်စီးခဲ့ပါတယ်။
BWM ရဲ့ တာဝန်ရှိသူက “မနေ့ညက ကျနော်တို့ မစ်ရှင် ၂ ခု လုပ်တယ်။ တစ်ခုက လွိုင်ကော်ပေါ့။ နမခက စစ်ကိုင်းတိုင်း၊ မကွေးတိုင်းမြောက်ပိုင်းနဲ့ ချင်းပြည်နယ်တဝိုက်က စစ်ကောင်စီရဲ့ တိုက်ခိုက်ရေး လက်ရုံးတပ်တွေကို အဓိက အမိန့်ပေး ကွပ်ကဲနေတာကြောင့် အဲဒေသက တော်လှန်ရေး အင်အားစုတွေအတွက် အတားအဆီး ဖြစ်နေတယ်” လို့ ပြောပါတယ်။
တခြား ထိခိုက်ပျက်စီးမှုတွေကို ဆက်လက်စုံစမ်းနေဆဲ ဖြစ်တာကြောင့် အချက်အလက် အတိအကျကို ထပ်မံ ဖော်ပြသွားမယ်လို့လည်း ဆိုပါတယ်။
မနေ့ ဇန်နဝါရီ ၁၄ ရက် ည ၇ နာရီမှာလည်း စစ်ကောင်စီရဲ့ ဒုစစ်ခေါင်းဆောင် စိုးဝင်းက ညစာစားပွဲ တက်ရောက်နေတဲ့ ကရင်နီပြည် ခန်းမထဲ BWM က ရှော့တိုက်ဒုံးနဲ့ ၅ လုံး ပစ်ခတ်တိုက်ခိုက်ခဲ့ပါတယ်။
အလားတူ ပြီးခဲ့တဲ့ ဇန်နဝါရီ ၄ ရက်ကလည်း တောင်ငူ လေတပ်စခန်းကို BWM က ရှော့တိုက်ဒုံး ၁၀ လုံးနဲ့ ပစ်ခတ်ခဲ့လို့ အရာရှိအပါအဝင် ၇ ဦး သေဆုံးခဲ့ပြီး လေယာဉ် ၂ စီးလည်း ပျက်စီးခဲ့ပါတယ်။
၂၀၂၄ ခုနှစ် ဒီဇင်ဘာ ၂၂ ရက်က တောင်ပိုင်းတိုင်းစစ်ဌာနချုပ် (တပခ)ကို BWM နဲ့ ပူးပေါင်းတပ်က ရှော့တိုက်ဒုံး ၇ လုံး ပစ်ခတ်တိုက်ခိုက်ရာ အရာရှိအပါအဝင် ၁၂ ဦး သေဆုံးခဲ့ကြောင်း BWM က ထုတ်ပြန်ခဲ့ဖူးပါတယ်။
