သတင်းဓာတ်ပုံ
လွေးလာဝ်ဇာရ်၊ မိုင်းရူကော၊ နိုဝင်ဘာ ၂၁ ရက်
တအာင်းပြည် ပညာရေးကောင်စီ- TLEC က ဦးဆောင်ဖွင့်လှစ်တဲ့ တအာင်းပညာရေး အကယ်ဒမီကျောင်း- TEA ရဲ့ အပတ်စဉ်(၁)က ကျောင်းသူကျောင်းသား ၁၁၇ ဦးကို ပညာရေး ဒီပလိုမာဘွဲ့ ပေးအပ်ခဲ့ပါတယ်။
ကျောင်းသား ၂၆ ဦးနဲ့ ကျောင်းသူ ၉၁ ဦး စုစုပေါင်း ၁၁၇ ဦးကို မနေ့ နိုဝင်ဘာ ၂၀ ရက်က တအာင်းဒေသတစ်နေရာမှာ ဒီပလိုမာဘွဲ့ ပေးအပ်ခြင်း အခမ်းအနားကို ကျင်းပပြုလုပ်ခဲ့ပါတယ်။
TLEC ဖွင့်လှစ်ထားတဲ့ အခြေခံပညာစာသင်ကျောင်းတွေမှာ ဆရာဆရာမအဖြစ် ၁ နှစ်ကြာ တာဝန်ထမ်းဆောင်ပြီးတဲ့နောက် အခုလို ပညာရေးဒီပလိုမာဘွဲ့ ပေးအပ်ခဲ့တာပဲ ဖြစ်ပါတယ်။
သင်တန်းဆင်းပွဲ အခမ်းအနားကို ပလောင်ပြည်နယ် လွတ်မြောက်ရေးတပ်ဦး/တအာင်းအမျိုးသား လွတ်မြောက်ရေး တပ်မတော်- PSLF/TNLA ရဲ့ အထွေထွေ အတွင်းရေးမှူး ဗိုလ်ချုပ် တားဘုန်းကျော်၊ စစ်ဦးစီးချုပ် ဗိုလ်ချုပ် တားဟိုပလန်၊ အထွေထွေ အတွင်းရေးမှူး(၂) ဗိုလ်မှူးကြီး တားပန်လ၊ တအာင်းအရပ်ဖက်အဖွဲ့အစည်းနဲ့ TLEC အပါအဝင် ဒေသခံလူထု ၁ ထောင်ခန့် တက်ရောက်ခဲ့ကြပါတယ်။
TEA အပတ်စဉ်(၂) သင်တန်းဆင်းပွဲကို ပြီးခဲ့တဲ့ ၂၀၂၅ ခုနှစ် ဧပြီ ၂၀ ရက်မှာ ကျင်းပပြုလုပ်ခဲ့ပြီး သင်တန်းသူ သင်တန်းသား ၂၇၅ ဦး တက်ရောက်အောင်မြင်ခဲ့ပါတယ်။
အပတ်စဉ်(၃) ဒီပလိုမာအတန်းကို လာမယ့် နိုဝင်ဘာလမှာ စတင်ဖွင့်လှစ်သွားမှာဖြစ်ပြီး လူဦးရေ ၁၅ဝ လက်ခံသင်ကြားမှာဖြစ်တယ်လို့ TEA ကျောင်းရဲ့ တာဝန်ရှိသူတစ်ဦးက ပြောပါတယ်။
ဒီပလိုမာအတန်းကို ၂ နှစ်ကြာ တက်ရောက်ရမှာဖြစ်သလို တက်ရောက်အောင်မြင်သူတွေဟာ TLEC ဖွင့်လှစ်ထားတဲ့ စာသင်ကျောင်းတွေမှာ အနည်းဆုံး ၃ နှစ် ပြန်လည် တာဝန်ထမ်းဆောင်ရမှာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
