ရွှေဖီမြေ၊ နိုဝင်ဘာ ၁၉ ရက်
ချင်းပြည်နယ် ကလေးမြို့နယ်၊ ဂန့်ဂေါမြို့နယ်၊ ဖလမ်းမြို့နယ်နဲ့ တီးတိန်မြို့နယ်တွေမှာ ဖြစ်ပွားနေတဲ့ တိုက်ပွဲအတွင်း စစ်ကောင်စီဘက်က ထိခိုက်သေဆုံးမှုများပြီး စစ်သုံ့ပန်းတချို့နဲ့ လက်နက်ခဲယမ်းတချို့ သိမ်းဆည်းမိခဲ့တယ်လို့ ချင်းပြည် (Chinland) အစိုးရ၊ ကာကွယ်ရေးဝန်ကြီးဌာနအောက်က မနေ့ နိုဝင်ဘာ ၁၈ ရက်မှာ ထုတ်ပြန်ထားပါတယ်။
တော်လှန်ရေးတပ်ဖွဲ့တွေက ကလေးမြို့နဲ့ ဂန့်ဂေါမြို့အကြားမှာ စစ်ကြောင်းတစ်ကြောင်းနဲ့ ဖလမ်းမြို့နဲ့ ဝေဘူလမြို့အကြား၊ တီးတိန်မြို့နဲ့ ခိုင်ကမ်းမြို့အကြားမှာ စစ်ကြောင်းတစ်ကြောင်းခွဲပြီး စစ်ကောင်စီတပ်နဲ့ တိုက်ပွဲဖြစ်ပွားနေတယ်လို့ ဆိုပါတယ်။
စစ်ကောင်စီတပ်ဘက်က လေယာဉ်နဲ့ ဒရုန်းကို အားပြုပြီး တိုက်ခိုက်နေပေမယ့် ဗိုလ်မှူး၊ ဗိုလ်ကြီးအဆင့် အရာရှိတွေ အပါအဝင် စစ်ကောင်စီအင်အား ၁၀၀ ခန့်ကို ချေမှုန်းနိုင်ခဲ့တယ်လို့ ဆိုပါတယ်။
ဒါ့အပြင် တိုက်ပွဲအတွင်း လက်နက်ခဲယမ်းတချို့ သိမ်းဆည်းနိုင်ခဲ့ပြီး စစ်သုံ့ပန်းတချို့လည်း ဖမ်းဆီးရမိခဲ့တယ်လို့ ထုတ်ပြန်ထားပေမယ့် အရေအတွက်အတိအကျကိုတော့ ဖော်ပြထားတာ မရှိပါဘူး။
တိုက်ပွဲမှာ မိတ်ဖက် Vakok PDF အပါအဝင် ကျောင်းသားတပ်မတော် (ABSDF)၊ PDF ခရိုင်တပ်ရင်းတွေ၊ ပြည်သူ့ကာကွယ်ရေးတပ်(ပကဖ)တွေနဲ့ Yaw Defense Force (YDF)၊ Chin National Defense Force (CNDF) ၊ PDF Zoland စတဲ့ မဟာမိတ်တပ်ဖွဲ့တွေက ပူးပေါင်းပါဝင်တိုက်ခိုက်ခဲ့တယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
