ယာရူစိင်၊ နိုဝင်ဘာ ၁၉ ရက်၊ ဖားကန့်
ကချင်ပြည် ဖားကန့်မြို့က ကျောက်လုပ်ကွက်တစ်ခုမှာ စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် ဒေသခံ ၂ ဦး ထိမှန်ဒဏ်ရာရရှိခဲ့တယ်လို့ ဖားကန့်မြို့ခံတစ်ဦးက ရွှေဖီမြေကို ပြောပါတယ်။
မနေ့ နိုဝင်ဘာလ ၁၈ ရက် နေ့လယ် ၁ နာရီ ၄၅ မိနစ်မှာ ဖားကန့်မြို့ မရှီကထောင်အုပ်စု ကျန်ဂတ်မှော်ရှိ ကျောက်လုပ်ကွက်တစ်ခုကို စစ်ကောင်စီတပ်က ဒရုန်းနဲ့ ဗုံး ၃ လုံး ကြဲချတိုက်ခိုက်ခဲ့တာ ဖြစ်ပါတယ်။
“တစ်ဦးတော့ ပေါင်ထိသွားတယ်။ အဲကျင်းက စားဝတ်နေရေးအတွက် ခက်ခဲတဲ့သူတွေက လာတူးကြတာ များတယ်။ ကိုယ်ထူကိုယ်ထ တူးကြတာပါ။ အဲလိုပဲ ရှာဖွေစားသောက်နေကြရတာပါ” လို့ အဆိုပါမြို့ခံက ပြောပါတယ်။
အဲဒီဗုံးကြဲတိုက်ခိုက်ခံရမှုကြောင့် အသက် ၂၅ နှစ်အရွယ်နဲ့ အသက် ၄၅ နှစ်အရွယ် အမျိုးသားတို့ ထိမှန်ဒဏ်ရာရရှိခဲ့တာ ဖြစ်ပါတယ်။
ပြီးခဲ့တဲ့ နိုဝင်ဘာ ၁၃ ရက် နေ့လယ် ၁၂ နာရီ ၃၆ မိနစ်မှာလည်း စစ်ကောင်စီတပ်ဟာ ဖားကန့်မြို့ ဗျူဟာကုန်းကနေ လက်နက်ကြီး ပစ်ခတ်တာကြောင့် လုံးခင်းအုပ်စု ဖဝါကျေးရွာက မူကြိုကျောင်းဝန်းထဲ ကျရောက်ပေါက်ကွဲခဲ့ပြီး ကျောင်းဆရာမ ၁ ဦးနဲ့ ၄ နှစ်အရွယ် မူကြိုကလေး ၁ ဦးတို့ ဒဏ်ရာရရှိခဲ့ပါတယ်။
ဖားကန့်မှာ စစ်တပ်က နေ့စဉ်လိုလို လက်နက်ကြီးနဲ့ ဒရုန်း အသုံးပြုကာ ဗုံးကြဲတိုက်ခိုက်နေတာကြောင့် ဒေသခံ ထိခိုက်သေဆုံးမှုလည်း နေ့စဉ်ရှိနေပြီး လက်ရှိမှာလည်း စစ်ကောင်စီတပ်နဲ့ KIA ပူးပေါင်းတပ်တို့အကြား စစ်ရေးတင်းမာနေတယ် သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
