လိုည်းထိုည်း၊ ကျံရ်နိုႎဲမ်ဘာ ဆငည်း 18၊ အိုမ်ယ်ုရ်
ဘိူန်းအယ်နံပ်တောပ်ဘည်က္လာင်း ကောန်အီမာည်း ကဝ်အီဂေါည်ရဝ်ပကုင်ကမာည်းနီန်အူအီး ဒါႈ ပလှံင်အိုမ်ယ်ုရ် အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း TNLA ကဲနီန် ကားအ်ုန်အီယိူဝ်ႇကဒါႇမိုဂူႈနီန်အူကြောင် ကပ္လါႇဖါ်ႈ တောပ်ပည်ကောန်ကညောမ် 2အီး 3အီးဘာတ်ဟာဝ်းအောႏ။
အ်ုန်ပဲန်ဒေဲႈ ခည်ကျံရ်နိုႎဲမ်ဘာ ဆငည်း 15 ခိင်ဆံန် ကပံတ် 3နြီဒိူန် ကားဒီန် ဂေါႇမိုႈအ်ုန်အာဝ်ဘယ်ဟိုက် ပဂေါင်ရဝ်လံင်လိုမ်း စီပဲန်အ်ုန်ဂ္လိင်ႎီရ်ဘိုးရဘံန်းအောႏ။
ကောန်အီမာည်း အ်ုန်အီဂေါည် ပရဝ်ကုင်ကမာည်းဒီန်အူအီး က္လာင်းဒါႈ “ဒီဒီန် အ်ုန်ရေဲႈခည်း။ နံင်မိုႈကားကဲဒီန် အာဝ်တောပ် 4W မာ် အာဝ်နံပ်။ နံင်ဆမာမိုႈစံမ် ကညာကားဒီန် အာဝ်ကျာင်ဒေင်”
အ်ုန်ဒါႈ ကားဒီန် အ်ုန်မိုႈကားအီဒဝ်ႎဲႈဖေးနာန်း ယိူဝ်ႇကဒါႇကီုင်းမိုဂူႈ နံင်ဟိုက်ဟာဝ်းကဒါႇမူစယ် ခေဲင်ကဲအီတောပ်ခေဲင်ကားဒီန် 10အီး ကောန်ကညောမ် 2အီးကာည်း ကောန်အီပ်ုန်ဘိူန်းအဆာက် 60ဆန်ုမ်နီန်အူအီး ဘိူန်းဟာဝ်းဖေးဆဲဝ်အောႏ။
ကောန်အီမာည်း ရကႎိုည်နီန် က္လာင်းဒါႈ ကနာည်နှာင်းအာဝ်ဘာည်းဘိုး ဘည်ဘာည်းလှေနီန် ကဆီုဝ်ကညာကားကဲ နံင်လိုခည်း အူန်းဒါဆဒိဒါင်းဒါင်း ကောႈအောႏ။
ဘံန်ဟောည်ႇလေႈဒေဲႈဆဒါင် မိုႈတ နံင်ႎီရ်ဒဲႈ မိုဂူႈကာည်း မိူင်မီတ် ကဲအီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်းကဲနီန် တတံပ်ကညာအာဏာဆီုက်ဇေဝ်ကဲ တိုအီးခေဲင်အရာပ်ကဲ ကဒါႇဂီုန်း ဟည်ဒဝ်ႎဲႈဟာဝ်းဂေါည်ဒိုႇ ကဒါႇလှံင်ကဲဟံရ်ယာ့်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
