မာည်းဖိူမ်ဆငဲ၊ ကျံရ်နိုႎဲမ်ဘာ ဆငည်း 16၊ မိုဂူႈ
ဘိူန်းအယ်နံပ်တတိုအီးခေဲင်အရာပ်ကဲဒါႈ တိုအီးခေဲင်ကီုင်းမိုဂူႈကဲ ဟည်ဒဝ်ဟာဝ်းဒိုႇ ကဒါႇဒီဟံရ်ကဲနီန် အူကဒည်ကီုင်းလေႈယာ့်အောႏ။
ဘံန်ကျံရ်နိုႎဲမ်ဘာ ဆငည်း 25 နံင်ရောတ်ဒေဲႈဒီန် TNLA ကဲ နံင်က္လိုတ်ႎီရ်ဖါ်ႈ ဒါႇကီုင်းမိုဂူႈ ဂေါႇမိုႈတံပ်ကညာအာဏာဆီုက်ဇေဝ်ကဲ နံင်လီပ်ဒေဲႈကီုင်း စီပဲန်တိုအီးခေဲင်အရာပ်ကဲ ဟည်ဒဝ်ႎဲႈဒိုႇအောႏ။
တိုအီးခေဲင်အရာပ်ကဲအူအီး က္လာင်းဒါႈ “တိုအီးခေဲင်ကီုင်းကဲ ဟည်ဒဝ်ႎဲႈဟာဝ်း ကပံတ် 60ခေဲင်ပယာႈယာ့်။ အီကီုတ်မိုႈလိူည် အီကိူဝ်ႈမာဝ်းကာည်း ကညာရေဲန်ဇီုင်းကာန်မာဝ်းစဲတ်ကဲနီန်ယာ့်အောႏ”
ဘိူန်းအယ်နံပ် မိုႈတ တိုအီးခေဲင်အရာပ်မိုဂူႈကဲ ဒဝ်ႎဲႈဟာဝ်း ပအိုမ်ယ်ုရ် အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်းကဲကာည်း ပကီုင်းမာဝ်းႎံင်း၊ ကီုင်းမာန်းတလေး ကဲအီမိုႈ ဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန်အောႏ။
ကောန်အီပ်ုန် ကဝ်အီဂေါည်ခေဲင်ကီုင်းဒီန်အူအီး က္လာင်းတဆျှိုည်ဖီမျေဒါႈ “ကဲအီဒဝ်မာ် ဟည်ဒဝ်ႎဲႈဒိုႇယာ့်။ ကံပ်ယိူဝ်းဘိုးအီးဒါႈ ကားဘိအူန်း ပမာဝ်းႎံင်းနီန် ကပံတ် 500ကြောင်”
မိုႈလိူည် ဘိူန်းအယ်တခေါရ်နံပ် မိုႈတ တံပ်ကညာအာဏာဆီုက်ဇေဝ်ကဲ အာဝ်ခွါင်းဒဲႈစိ ခြိူဝ်းမျိုးတအာင်း ကဲအီဒဝ်ႎဲႈ ယိူဝ်ႇကဒါႇမိုဂူႈ ဟိုက်ဒေဲႈကဒါႇမာဝ်းႎံင်းကဲနီန် ခ္လေါႈဟာဝ်းခ္လေါႈႎီရ်အောႏ။
ဘိူည်ဘိူန်းအယ်နံပ် မိုႈတ တံပ်ဆီုက်တအာင်း – PSLF/TNLA ကဲ နံင်က္လိုတ်ႎီရ်ဒါႇ ကီုင်းမိုဂူႈနီန်မာ် တံပ်ဗျူဟာမိုဂူႈ၊ တံပ်လံပ်ဒံန်ခြဲ ကူန်ရဝ်မာဂါင် မာန်းတလေးကဲ ပ္လိူရ်ႈလေႈဒါႈ ကဲနံင်ဆီုပ်ရီန်းဟာဝ်း ကနာည်နှာင်းကီုင်းနီန် အာဝ်ဇောႈချှူမ်ဟာဝ်းအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
