လွေးလာဝ်ဇာရ်၊ နိုဝင်ဘာ ၁၃ ရက်၊ ကန့်ဘလူ
စစ်ကိုင်းတိုင်း ကန့်ဘလူမြို့နယ်ကနေ ခင်ဦးဘက် စစ်ကြောင်း ထိုးလာတဲ့ စစ်ကောင်စီတပ်ရဲ့ တပ်မ ၃၃ လက်အောက်ခံ ခြေလျင်တပ်ရင်း ၁၁၁ ကို တော်လှန်ရေး ပူးပေါင်းတပ်ဘက်က ကြားဖြတ်တိုက်ခိုက်ခဲ့တာကြောင့် ၅၀ ဦး သေဆုံးခဲ့တယ်လို့ ခင်ဦးမြို့နယ် ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။
မနေ့ နိုဝင်ဘာ ၁၂ ရက် မနက် ၈ နာရီ ၅၀ မိနစ်မှာ ကန့်ဘလူမြို့နယ် ဝက်တိုးရွာရှိ စစ်တပ် အထိုင်စခန်းမှ ခင်ဦးမြို့နယ်ဘက် အင်အား ၁၀၂ ဦးနဲ့ စစ်ကြောင်း ထိုးလာချိန် တော်လှန်ရေးတပ်က ကန့်ဘလူမြို့နယ် ယင်းတိုက်ရွာအနီး ဝိုင်းဝန်းတိုက်ခိုက်ခဲ့တာလို့ ဆိုပါတယ်။
စစ်တပ်ဘက်က စစ်ကြောင်းမှူးအပါအဝင် ၅၀ ဦး သေဆုံးခဲ့တာဖြစ်ပြီး စစ်သုံ့ပန်း ၁၅ ဦးနဲ့ လက်နက်ခဲယမ်းတွေလည်း သိမ်းဆည်းရမိထားတယ်လို့ သိရပါတယ်။
ရှင်းလင်းရေး ဆက်မလုပ်နိုင်သေးတာကြောင့် စစ်တပ်ဘက်က သေဆုံးမှု ပိုများနိုင်တယ်လို့ ရေဦးမြို့နယ် ပြည်သူ့ကာကွယ်ရေးအဖွဲ့မှ တာဝန်ခံတစ်ဦးက ရွှေဖီမြေသို့ ပြောပါတယ်။
ရေဦး ပကဖ တာဝန်ခံတစ်ဦးက “အခုလက်ရှိ အသေ ၅၀ ကျော် တွေ့ရပါတယ်။ ရှင်းလင်းရေး ဆက်မလုပ်နိုင်သေးလို့ပါ။ သေဆုံးမှုက ထုတ်ပြန်ထားတဲ့ ၅၀ ထက် ပိုများနိုင်တယ်” လို့ ပြောပါတယ်။
သိမ်းဆည်းရမိထားတဲ့ လက်နက်ခဲယမ်းတွေကတော့ MA-1 နှစ်လက်၊ MA-3 နှစ်လက်၊ MA-4 တစ်လက်၊ G3 ၇ လက်၊ MA-6 တစ်လက်၊ MA-N တစ်လက်၊ ကာဘိုင် ၅ လက်၊ စလေယာ တစ်လက်၊ လေးလက်ဒရုန်း တစ်စီး၊ ဂျန်ဘာအကြီး တစ်လုံး၊ ပါဝါစတေရှင် တစ်လုံး၊ လက်ပ်တော့ တစ်လုံး၊ ၄၀ မမဗုံးတစ်လုံးနဲ့ အီနာဂါ ၃ လုံး ပါဝင်တယ်လို့ ဆိုပါတယ်။
တိုက်ခိုက်မှုကို ခင်ဦးပကဖအပြင် ကန့်ဘလူခရိုင် ပကဖ၊ ကာဘိုးတိုက်နယ်ပကဖ၊ ကျောက်တိုင်ပကဖ၊ ရေဦးမြို့နယ် လက်ရုံးပကဖ၊ PDF၊ ပြည်သူ့လုံခြုံရေး(ပလဖ) စုဖွဲ့တပ်ခွဲတို့ ပါဝင်တိုက်ခိုက်ခဲ့တယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
