မိုင်းရူပ၊ နိုဝင်ဘာ ၁၁ ရက်၊ မိုးမိတ်
တအာင်းတပ်မတော်- PSLF/TNLA က စစ်ကောင်စီကို ပြန်ပေးမယ့် ရှမ်းမြောက် မိုးမိတ်မြို့ကို စစ်ကောင်စီလက်အောက် မရောက်အောင် ခုခံကာကွယ်သွားမယ်လို့ မိုးမိတ်ခရိုင် ပြည်သူ့ကာကွယ်ရေးအဖွဲ့က မနေ့ နိုဝင်ဘာ ၁၀ ရက်မှာ ထုတ်ပြန်ပါတယ်။
လက်ရှိ မိုးမိတ်မြို့နယ်မှာ ဖြစ်ပွားနေတဲ့ စစ်ရေးအခြေအနေ ဘယ်လိုအခက်အခဲ ရှိစေကာမူ လူထုတွေနဲ့ တစ်သားတည်း ရှိနေပြီး မြို့ကိုလည်း စစ်ကောင်စီလက်အောက် မရောက်အောင် မဟာမိတ်တပ်တွေနဲ့အတူ ခုခံကာကွယ်သွားမယ်လို့ ဆိုပါတယ်။
လက်ရှိ မိုးမိတ်မြို့မှာ ဒေသခံတချို့ ထွက်ပြေးတိမ်းရှောင်နေကြပြီး PSLF/TNLA ဘက်က အုပ်ချုပ်ရေးလုပ်ငန်း ဆက်လက် လည်ပတ်နေတယ်လို့ မိုးမိတ်မြို့တွင်းမှာ ရှိနေသူတစ်ဦးက ရွှေဖီမြေကို ပြောပါတယ်။
“ကြောက်တဲ့သူတော့ ရှောင်ကြပြီ။ မြို့ထဲမှာ ကျန်တဲ့သူတွေတော့ ကျန်တယ်။ နိုဝင်ဘာ ၂၅ ရက်ဆို TNLA ဘက်က မြို့ကနေ ဆုတ်မယ်ကြားတယ်”
မိုးမိတ်မြို့နယ်မှာ TNLA အပြင် ကချင်တပ်မတော်- KIA၊ ရှမ်းတပ်- SSPP၊ ပြည်သူ့လွတ်မြောက်ရေးတပ်မတော်- PLA အပါအဝင် အမျိုးသားညီညွတ်ရေးအစိုးရ- NUG လက်အောက်ခံတပ်တွေ သွားလာလှုပ်ရှားနေကြတာ ဖြစ်ပါတယ်။
တရုတ်နိုင်ငံရဲ့ ကြားဝင်မှုကြောင့် စစ်ကောင်စီနဲ့ တအာင်းတပ် အပစ်ရပ်ဖို့ သဘောတူပြီးနောက် တအာင်းတပ်က ၎င်းတို့ ထိန်းချုပ်ထားတဲ့ မိုးကုတ်နဲ့ မိုးမိတ်မြို့နယ်ကို စစ်ကောင်စီထံ ပြန်လည် လွှဲပြောင်းပေးရမှာပါ။
မိုးကုတ်နဲ့ မိုးမိတ်အခြေစိုက် တော်လှန်ရေးတပ်တွေကတော့ အဲဒီမြို့ ၂ ခုကို စစ်ကောင်စီလက်အောက် မရောက်အောင် ခုခံကာကွယ်သွားမယ်လို့ အသီးသီး ထုတ်ပြန်ထားကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
