ယာရူစိင်၊ နိုဝင်ဘာ ၁၁ ရက်၊ ဖားကန့်
ကချင်ပြည်နယ် ဖားကန့်မြို့နယ် ကထန်ရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦး သေဆုံးပြီး ကလေးငယ် ၁ ဦး ပြင်းထန်ဒဏ်ရာ ရရှိခဲ့တယ်လို့ ဒေသခံ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
ဒီနေ့ နိုဝင်ဘာ ၁၁ ရက် နေ့လယ် ၁ နာရီ ၃၄ မိနစ်မှာ လုံးခင်းအုပ်စု ကထန်ရွာကွက်သစ်ကို စစ်တပ်က Y-12 နဲ့ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
“လောလောဆယ်တော့ အမေဖြစ်သူက သေဆုံးတာပါ။ သားဖြစ်သူက ဒဏ်ရာ ပြင်းထန်နေပါတယ်။ ၃ နှစ်အရွယ် ကလေးငယ်ပါ။ နေအိမ်တွေ ပျက်တာလည်း များပါတယ်”
ကထန်ရွာမှာ တိုက်ပွဲ ဖြစ်ပွားခြင်း မရှိတဲ့အပြင် ဒေသခံတွေသာ အများစု နေထိုင်တာကြောင့် ထိခိုက်သေဆုံးမှုလည်း ထပ်တိုးနိုင်တယ်လို့ ဆိုပါတယ်။
ပြီးခဲ့တဲ့ နိုဝင်ဘာ ၈ ရက်မှာလည်း စစ်တပ် ပစ်ခတ်တဲ့ လက်နက်ကြီးကြောင့် ယူမာရွာက ဘုန်းကြီးကျောင်းပေါ် ကျရောက်ပေါက်ကွဲပြီး ဘုန်းကြီးကျောင်းဆောင် ထိမှန်ပျက်စီးခဲ့ပါတယ်။
အလားတူ ပြီးခဲ့တဲ့ စက်တင်ဘာ ၂၂ ရက် ညနေ ၅ နာရီခွဲဝန်းကျင်မှာလည်း ဖားကန့်မြို့နယ် ဆိပ်မူအုပ်စု ကျောက်သွေးတောင်ရွာကွက်သစ်ကို စစ်တပ်က ဒရုန်းနဲ့ ဗုံးကြဲတိုက်ခိုက်ခဲ့တာကြောင့် သားအဖ ၂ ဦး သေဆုံးခဲ့ပါတယ်။
ဖားကန့်မှာ စစ်တပ်က နေ့စဉ်လိုလို လက်နက်ကြီးနဲ့ ဒရုန်း အသုံးပြုကာ ဗုံးကြဲတိုက်ခိုက်နေတာကြောင့် ဒေသခံ ထိခိုက်သေဆုံးမှုလည်း နေ့စဉ် ရှိနေပြီး လက်ရှိမှာတော့ စစ်ကောင်စီတပ်နဲ့ KIA ပူးပေါင်းတပ်အကြား စစ်ရေး တင်းမာနေဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
