ယာရူစိင်၊ နိုဝင်ဘာ ၁၀ ရက်၊ သီပေါ
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် သီပေါမြို့မှာ တအာင်းတပ်နဲ့ ဆက်စပ်မှု ရှိတယ်ဆိုတဲ့ စွပ်စွဲချက်နဲ့ ဒေသခံ ၃၅ ဦးကို စစ်ကောင်စီတပ်က ဖမ်းဆီးခေါ်ဆောင်သွားခဲ့တယ်လို့ ဖမ်းဆီးခံရသူနဲ့ နီးစပ်သူတစ်ဦးက ရွှေဖီမြေကို ပြောပါတယ်။
သီပေါမြို့နယ် တုံဆင့်၊ စံဖိတ်ရွာနဲ့ မြို့ပေါ်ရပ်ကွက်တချို့က ဒေသခံ အမျိုးသား ၂၅ ဦးနဲ့ အမျိုးသမီး ၁၀ ဦးတို့ကို စစ်တပ်က ဖမ်းဆီးစစ်ဆေးခဲ့တာပဲ ဖြစ်ပါတယ်။
“တချို့တော့ ပြန်လွှတ်လာပါပြီ။ တချို့လူငယ်ပိုင်းအရွယ် လူငယ်အများစုတော့ ပြန်မလွှတ်သေးဘူး။ သူတို့က ဆက်စပ်မှု ရှိတယ်ဆိုတဲ့ စွပ်စွဲချက်နဲ့ ဒေသခံတွေကို ဖမ်းချင်သလို ဖမ်းလို့မရဘူးလို့မြင်တယ်” လို့ ဖြစ်စဉ်သိရှိသူတစ်ဦးက ပြောပါတယ်။
စစ်တပ်ရဲ့ ဖမ်းဆီးစစ်ဆေးတာ ခံရတဲ့ ဒေသခံတွေထဲ တအာင်းလူမျိုးအများစု ပါဝင်နေတယ်လို့ နောက်ထပ် သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“သိသလောက်ဆို သီပေါမှာရှိတဲ့ ပလောင်တွေ အဖမ်းခံရတာ များတယ်။ အသိထဲက ၅ ယောက်မကဘူး”
TNLA အပြင် ပြည်သူ့ကာကွယ်ရေးတပ်ဖွဲ့- PDF နဲ့ ဆက်စပ်တယ်လို့ ယူဆရတဲ့ ဒေသခံတွေရဲ့ နေအိမ်နဲ့ ဆိုင်ခန်း ၉၀ ကျော်ကိုလည်း စစ်တပ်က ချိတ်ပိတ်ထားတယ်လို့ နောက်ထပ် သီပေါမြို့ခံတစ်ဦးက ပြောပါတယ်။
“တအာင်းတပ် ထိန်းချုပ်စဉ်က ရဲဘော်တွေ ဝင်ဝယ်ဖူးတဲ့ ဆိုင်တွေကအစ ချိတ်ပိတ်ခံရတာပါ။ တချို့ဆိုင်ကျ ဘာဆက်စပ်မှုမှ မရှိပါဘူး”
ဖမ်းဆီးခံရတဲ့ အမျိုးသမီး ၁၀ ဦးထဲက အသက် ၁၈ နှစ် မပြည့်သေးတဲ့ အမျိုးသမီး ၇ ဦး ပါဝင်နေကြောင်း ရွှေဖီမြေက စုံစမ်းသိရှိရပါတယ်။
ချိတ်ပိတ်ခံရတဲ့ နေအိမ်၊ ဆိုင်ခန်းပေါင်း ၉၀ ကျော် ရှိတယ်လို့ ဒေသခံတွေက ပြောဆိုနေပေမဲ့ ရွှေဖီမြေအနေနဲ့ သီးခြားအတည်မပြုနိုင်ပါဘူး။
ဒါ့အပြင် စစ်တပ်ဟာ ပြီးခဲ့တဲ့ အောက်တိုဘာလ နောက်ဆုံးအပတ်ကစပြီး ကျောက်မဲမြို့တွင်းက နေအိမ်တွေကိုလည်း တအာင်းတပ်နဲ့ ဆက်စပ်မှု ရှိတယ်ဆိုပြီး ချိတ်ပိတ်တာတွေ ပြုလုပ်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
