ပျားကြီး၊ ဇန်နဝါရီ ၁၄ ရက်၊ ဖားကန့်
ကချင်ပြည်နယ် ဖားကန့်မြို့နယ် စပေါ့ကျေးရွာ ရတနာအဓိပတိ ကျောက်မျက်တူးဖော်ရေးကုမ္ပဏီရဲ့ စွန့်ပစ်မြေစာပုံ နွံကန် ပေါက်မှုကြောင့် ကလေးငယ် ၄ ဦးအပါအဝင် သေဆုံးသူ ၁၂ ဦးအထိ ရှိလာတယ်လို့ ဒေသခံတွေက ပြောပါတယ်။
မနေ့ ဇန်နဝါရီ ၁၂ ရက် မနက် ၁ နာရီခွဲဝန်းကျင်က မြေစာစွန့်ပစ်ရာ နွံကန် လျှံထွက်ပြီး စပေါ့ကျေးရွာ အမှတ် ၃ ရပ်ကွက်က နေအိမ်တွေကို နွံ ဖုံးလွှမ်းခဲ့တာကြောင့် လူသေဆုံးမှု ရှိနေတာ ဖြစ်ပါတယ်။
“ညသန်းခေါင်ကျော်ကြီး ဖြစ်တာဆိုတော့ ထွက်ပြေးချိန် မရလိုက်တာ။ တချို့ဆို မိသားစုလိုက် ပါသွားတာ။ အလောင်းတွေလည်း တော်တော်များများ ပြန်ရပြီ။ ကလေးနဲ့ အမျိုးသမီးတွေ များတယ်” လို့ ကူညီကယ်ဆယ်ရေး လုပ်ကိုင်နေတဲ့ ဒေသခံတစ်ဦးက ပြောပါတယ်။
သေဆုံးသူတွေထဲ အသက်အငယ်ဆုံးက ၂ နှစ်အရွယ် မောင်အောင်မျိုးထက်ဖြစ်ပြီး အမျိုးသမီးက ၆ ဦးအထိ ပါဝင်နေပါတယ်။
ကျောက်မျက်တူးဖော်ရေးကုမ္ပဏီရဲ့ မြေစာ စွန့်ပစ်ချိန်မှာ ဖိအားကြောင့် အောက်မှာရှိတဲ့ နွံတွေ ကန်ထွက်ပြီး အနီးအနားက နေအိမ်တွေပေါ် ဖုံးလွှမ်းခဲ့တာလို့ ဒေသခံတွေက ပြောဆိုပါတယ်။
အခုလို နွံတွေ ဖုံးလွှမ်းမှုကြောင့် မြေစာပုံအနီးအနားမှာရှိတဲ့ နေအိမ်ပေါင်း ၅၀ ကျော် ပြိုကျပျက်စီးခဲ့ပြီး ရှာဖွေကယ်ဆယ်ရေးလုပ်ငန်းကိုလည်း ဒီနေ့မနက်ပိုင်းအထိ ဆက်လက် လုပ်ဆောင်နေတယ်လို့ ကူညီပေးနေသူတွေက ပြောပါတယ်။
