လွေးဇွန်မိုး၊ နိုဝင်ဘာ ၆ ရက်၊ ပုလော
ပစ္စတိုသေနတ်အတုနဲ့ လူထုတွေကို ငွေညစ်ခြိမ်းခြောက်နေတဲ့ တနင်္သာရီတိုင်း မြိတ်ခရိုင် ပုလောမြို့နယ် အမှတ် ၄ ရပ်ကွက် အုပ်ချုပ်ရေးမှူး စိုးဝေနဲ့ ၎င်းရဲ့တပည့်ဖြစ်သူ ပြည်သူ့စစ်မှုထမ်းတစ်ဦးကို ပစ်ခတ်ရှင်းလင်းခံခဲ့ရပါတယ်။
ပြီးခဲ့တဲ့ အောက်တိုဘာ ၂၃ ရက် မနက် ၈ နာရီဝန်းကျင်က ပုလောမြို့ ကျောက်စုဂိတ်အနီးမှာ ၎င်းတို့ ၂ ဦးကို မြိတ်ခရိုင် အမှတ်(၁)တပ်ရင်းနဲ့ ကရင်အမျိုးသားကာကွယ်ရေးတပ်- KNDO ပူးပေါင်းမဟာမိတ်တပ်ဖွဲ့က ပစ်ခတ်ခဲ့တာလို့ မြိတ်ခရိုင် အမှတ်(၁)တပ်ရင်းက မနေ့ နိုဝင်ဘာ ၅ ရက်မှာ ထုတ်ပြန်ထားပါတယ်။
မြိတ်ခရိုင် အမှတ်(၁)တပ်ရင်း သတင်းနဲ့ပြန်ကြားရေးဌာန တာဝန်ခံက “လူငယ်တွေကို အတင်းအဓမ္မ စစ်မှုထမ်း လူသစ်စုဆောင်းတယ်။ အကယ်၍ စစ်မှုထမ်းစာရင်း ပါနေတယ်ဆိုရင် မပါအောင် သူလုပ်ပေးမယ်။ ငွေဘယ်လောက် ပေးဆိုတာမျိုး တောင်းခံတာ ရှိတယ်။ အရပ်သားတွေ စစ်ကောင်စီဂိတ်ကို ဖြတ်သန်း ပစ္စည်းသယ်တဲ့အခါ သယ်မယ့်စာရင်း ကြိုပေးရတာ ရှိတယ်။ အကယ်၍ စာရင်း မကိုက်ညီတဲ့အခါ အကုန်သိမ်းဆည်းတာမျိုးတွေ လုပ်လေ့ရှိတယ်” လို့ ပြောပါတယ်။
ပစ်ခတ်မှုကြောင့် ၂ ဦးစလုံး ပွဲချင်းပြီး သေဆုံးခဲ့ပြီးတော့ AK-47 ရိုင်ဖယ် ၁ လက်၊ ကျည်ဘောက် ၁ ခု၊ ၇.၆၂ ကျည် ၇ တောင့်၊ ကလေးကစားစရာ ပစ္စတို ၁ လက်၊ ကလေးကစားစရာ လက်ပစ်ဗုံး ၂ လုံးနဲ့ Vivo ဖုန်းအစုတ် ၁ လုံး သိမ်းဆည်းရမိခဲ့တယ်လို့ ဖော်ပြထားပါတယ်။
ပစ်ခတ်ခံရတဲ့ အုပ်ချုပ်ရေးမှူး စိုးဝေဟာ လူထုတွေကို လက်နက်အတုနဲ့ ငွေညှစ်ခြိမ်းခြောက်တာ၊ စစ်မှုထမ်း အတင်းအကြပ် စုဆောင်းတာ၊ အနိုင်ကျင့်မှုတွေ လုပ်ဆောင်နေပြီး မပြုလုပ်ဖို့ တော်လှန်ရေးတပ်ဘက်က အကြိမ်ကြိမ် သတိပေးခဲ့ပေမဲ့ မလိုက်နာတာကြောင့် ပစ်ခတ်ခဲ့ရှင်းလင်းခဲ့တာဖြစ်တယ်လို့ ထုတ်ပြန်ချက်ထဲ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
