ရဲမာန်၊ နိုဝင်ဘာ ၆ ရက်၊ အရာတော်
စစ်ကိုင်းတိုင်း အရာတော်မြို့နယ်ထဲက အမှတ် ၂ မဲရုံလုပ်မယ့် ကျောင်းဂိတ်ကို တော်လှန်ရေးတပ်ဖွဲ့က ဝင်ရောက်တိုက်ခိုက်ရာ စစ်ကောင်စီတပ်ဖွဲ့ဝင်အားလုံး ထွက်ပြေးသွားခဲ့တယ်လို့ သိရပါတယ်။
မနေ့ နိုဝင်ဘာ ၅ ရက် မနက်အစောပိုင်းမှာ ဝင်ရောက်တိုက်ခိုက်ခဲ့တာဖြစ်ပြီး စစ်ကောင်စီတပ်ရဲ့ လက်နက်တချို့လည်း သိမ်းဆည်းရမိခဲ့ကြောင်း အရာတော်မြို့နယ် Local အဖွဲ့အစည်း သတင်းနဲ့ပြန်ကြားရေးတာဝန်ခံ ကိုအောင်စည်က ရွှေဖီမြေကို ပြောပါတယ်။
“အမှတ်(၂)ကျောင်းဂိတ်ပါ။ မဲရုံလုပ်မယ့်ကျောင်းပေါ့။ ပစ်ခတ်မှုက မိနစ်ပိုင်း ဖြစ်ပါတယ်။ စစ်ကောင်စီတပ်ဖွဲ့က အကုန်ထွက်ပြေးကုန်တာ။ အထိခိုက်လည်း ရှိပါတယ်။ အဲဂိတ်မှာ အင်အား ၁၅ လောက် ရှိပါတယ်”
တိုက်ခိုက်မှုဟာ မိနစ် ၂၀ ကျော် ကြာမြင့်ခဲ့ပြီး တော်လှန်ရေးတပ်ဖွဲ့ဘက်က အထိအခိုက် မရှိဘဲ ပြန်လည်ဆုတ်ခွာနိုင်ခဲ့တယ်လို့ ၎င်းက ပြောဆိုပါတယ်။
တိုက်ခိုက်မှုကို အရာတော်မြို့နယ် ကျားသစ်နက်ပြောက်ကျားတပ်ဖွဲ့- LPDF နဲ့အတူ အရာတော်မြို့နယ်နဲ့ ဒီပဲယင်းပြည်သူ့ကာကွယ်ရေးတပ်ဖွဲ့တို့က ပူးပေါင်းတိုက်ခိုက်ခဲ့တယ်လို့ ၎င်းက ဆက်ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
