မြတ်နိုး၊ နိုဝင်ဘာ ၃ ရက်၊ နမ့်ဖတ်ကာ
ကွတ်ခိုင်မြို့နယ် နမ့်ဖတ်ကာ မနောင်ယန် ရပ်ကွက် ၅ မှာ မနေ့ နိုဝင်ဘာ ၂ ရက် ညနေ ၅ နာရီခန့်က စစ်ကျန်လက်နက်ကျည် ကောက်ယူဖြုတ်ရာကနေ ပေါက်ကွဲပြီး ဒေသခံ အမျိုးသား ၂ ဦး သေဆုံးခဲ့ကြောင်း ဒေသခံတွေဆီက သိရပါတယ်။
“သူတို့ဟာသူတို့ စစ်ကျန်လက်နက်ကျည် ဖြုတ်ကြရာက ပေါက်ကွဲသွားလို့ ဆုံးသွားတာ။ ခေါင်းပိုင်း၊ မျက်နှာတွေ ထိထားတာကို ကြည့်ရရင် နှစ်ယောက်သား ခေါင်းငုံ့ပြီး ဖြုတ်ကြည့်နေကြချိန် ပေါက်ကွဲလာပုံပဲ” လို့ ဒေသခံ အမျိုးသားတစ်ဦးက ပြောပါတယ်။
သေဆုံးသွားသူ ၂ ဦးဟာ နမ့်ဖတ်ကာဒေသခံဖြစ်ပြီး တစ်ဦးက မနောင်ယန်မှာ နေထိုင်သူဖြစ်ပြီး နောက်တစ်ဦးက မန်မောဝ်မှာ နေထိုင်သူ ဖြစ်တယ်လို့ သူက ပြောပါတယ်။
“သူတို့နှစ်ယောက်ထဲက တစ်ယောက်က ကောက်လာတာ နှစ်ယောက်သား ဖြုတ်ကြည့်ကြတာ ပေါက်ကွဲသွားတာလို့ ပြောတယ်။ အရက်လည်း သောက်ထားကြတယ်လို့ပြောတယ်” ဆိုပြီး နောက်ထပ် ဒေသခံ အမျိုးသားတစ်ဦးက ပြောပါတယ်။
အဲဒီလက်နက်ကျည်ဟာ တိုက်ပွဲ ဖြစ်ပွားတုန်းက မပေါက်ကွဲသေးတဲ့ စစ်ကျန် ၆၀ မမ လက်နက်ကြီးကျည်ဟောင်းလို့ သိရပြီး အထဲက ယမ်း ထုတ်ယူဖို့ ကြိုးစားရာမှာ ပေါက်ကွဲသွားတာလို့ သူက ပြောပါတယ်။
ပြီးခဲ့တဲ့ ၂၀၂၄ ခုနှစ် အောက်တိုဘာလကလည်း နမ့်ဖတ်ကာ ပန်ခါးရွာက အမျိုးသားနှစ်ဦး မပေါက်ကွဲသေးတဲ့ စစ်ကျန် ၆၀ မမ ကျည်ထဲက ယမ်းမှုန့်တွေ ထုတ်ယူဖို့ ကြိုးစားရာက ပေါက်ကွဲပြီး သေဆုံးခဲ့ဖူးပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
