ရွှေဖီမြေ၊ နိုဝင်ဘာ ၁ ရက်
စစ်ကောင်စီတပ်ရဲ့ လေကြောင်းနဲ့ ဒရုန်းဗုံးကြဲ တိုက်ခိုက်မှုကြောင့် အောက်တိုဘာလအတွင်း အရပ်သား ၄၉ ဦး သေဆုံးပြီး ၇၁ ဦး ဒဏ်ရာရ ရရှိခဲ့ကြောင်း တအာင်းတပ်မတော်က ဒီနေ့ နိုဝင်ဘာ ၁ ရက်မှာ ထုတ်ပြန်လာပါတယ်။
သေဆုံးသူတွေထဲ သံဃာတော် ၂ ပါး၊ ကလေး ၁၀ ဦး၊ အမျိုးသား ၁၆ ဦး၊ အမျိုးသမီး ၂၁ ဦးတို့ဖြစ်ပြီး ဒဏ်ရာရသူတွေထဲ သံဃာတော် ၆ ပါး၊ ကလေး ၂၆ ဦး၊ အမျိုးသား ၂၀ ဦး၊ အမျိုးသမီး ၁၉ ဦးတို့ပဲ ဖြစ်ပါတယ်။
ဒါ့အပြင် နေအိမ် ၁၇၅ အိမ်၊ စာသင်ကျောင်း ၅ ကျောင်း၊ ဘုန်းကြီးကျောင်း ၇ ကျောင်း၊ ကျောင်းဆောင် ၉ ဆောင်၊ အဆောက်အဦး ၆ ခု၊ မွေးမြူးရေးခြံ ၂ ခြံ၊ ဆိုင်ခန်း ၅ ခန်း၊ လက်ဖက်စက်ရုံ ၁ ရုံ၊ ဆိုင်ကယ် ၄ စီးနဲ့ ကား ၁၀ စီးလည်း ဗုံးစထိမှန်ကာ ပျက်စီးခဲ့ကြောင်း ဖော်ပြထားပါတယ်။
ထိခိုက်သေဆုံးသူ၊ ဒဏ်ရာရသူနဲ့ ပျက်စီးမှုတွေဟာ ရှမ်းမြောက် ကျောက်မဲ၊ နမ္မတူ၊ မန်တုံ၊ သီပေါ၊ မိုင်းလုံ၊ မိုင်းငေါ့၊ နမ့်ဆန်၊ မိုးမိတ်နဲ့ မန္တလေးတိုင်း မိုးကုတ်မြို့နယ်တွေမှာ ဖြစ်ပွားခဲ့တာပဲ ဖြစ်ပါတယ်။
စစ်တပ်နဲ့ တအာင်းတပ်မတော်တို့အကြား အောက်တိုဘာလကုန်အထိ တိုက်ပွဲ ဖြစ်ပွားခဲ့ပြီး အောက်တိုဘာ ၂၈ နဲ့ ၂၉ ရက်က တရုတ်မှာ ပြုလုပ်ခဲ့တဲ့ ဆွေးနွေးပွဲအတွင်း အပစ်အခတ် ရပ်စဲရေး သဘောတူလက်မှတ် ရေးထိုးခဲ့ကာ မိုးကုတ်နဲ့ မိုးမိတ်မြို့ကို စစ်ကောင်စီတပ်ထံ ပြန်လည် လွှဲပြောင်းပေးခဲ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
