ယာရူစိင်၊ အောက်တိုဘာ ၃၁ ရက်၊ ပုဏ္ဏားကျွန်း
ရခိုင်ပြည်နယ် ပုဏ္ဏားကျွန်းမြို့နယ်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ကလေးငယ်အပါအဝင် ၄ ဦးသေဆုံးပြီး ၉ ဦးထိမှန်ဒဏ်ရာရရှိခဲ့တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ အောက်တိုဘာ ၃၁ ရက် နေ့လယ် ၁၂ နာရီဝန်းကျင်မှာ ပုဏ္ဏားကျွန်းမြို့နယ် ပန်းနီလာကျေးရွာထဲကို စစ်တပ်က ပေါင် ၃၀၀ ဗုံး ၂လုံးကြဲချတိုက်ခိုက်ခဲ့တာ ဖြစ်ပါတယ်။
“သေတဲ့ထဲက ကလေးလည်း ပါဝင်တယ်။ ဒဏ်ရာသူထဲမှာလည်း ဒဏ်ရာပြင်းထန်တဲ့ သူတွေပါဝင်တယ်။ ပန်းနီလာကျေးရွာ စာသင်ကျောင်းရှေ့မှာကျတာ။ Y12 နဲ့ လာချတာ။ ၁၁ နာရီ ၃၅ မိနစ် ၄ လုံး ပုဏ္ဏားကျွန်းမြို့ပေါ်ကို ကြဲသွားတာ။ ၁၁ နာရီ ၃၇ မိနစ်အချိန်ကျ ပန်းနီလာကျေးရွာဘက်ကို ၂ လုံးပြန်ချလိုက်တာ”လို့ သတင်းအရင်းအမြစ်က ဆက်ပြောပါတယ်။
အလားတူ မနေ့က နေလယ်မှာလည်း ပုဏ္ဏားကျွန်းမြို့ပေါ်ကိုလည်း စစ်ကောင်စီက တိုက်လေယာဥ်နှစ်စီးနဲ့ ဗုံးသီး ၈ လုံးထက်မနည်း လေကြောင်းကနေ တိုက်ခိုက်ခဲ့ပါတယ်။
မနေ့ အောက်တိုဘာ ၃၀ ရက် ညနေ ၄ နာရီခွဲဝန်းကျင်မှာလည်း ကျောက်ဖြူမြို့နယ်၊ ဇင်ချောင်းတိုက်နယ်၊ ကုန်ဘွေရွာကို စစ်ကော်စီတပ်က လေကြောင်းကနေ ဗုံးကြဲတိုက်ခိုက်လို့ အမျိုးသမီးတွေအပါအဝင် ၅ ဦး သေဆုံးပြီး ၁၀ ကျော် ဒဏ်ရာရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
